ვოცნებობ "ფერად" ტელევიზიაზე საქართველოში პირველად ტელევიზია გასული საუკუნის 50-იანი წლების ბოლოს გამოჩნდა. ეს იყო შავ-თეთრი ტელევიზია. მას შემდეგ 50 წელზე მეტი გავიდა და ჩვენ ისევ შავ-თეთრ ტელეციზიებს შევსცქერით. ერთი ტელევიზია მიყვება, თუ როგორ განათდა და გაბრწყინდა ქვეყანა, მეორე კი მარწმუნებს, რომ ქვეყანაში მხოლოდ "შავი" ფერებია და ყველაფერი ინგრევა. ერთი მეუბნება, რომ მსოფლიოში პირველ ადგილზე ვართ, მეორეს მიხედვით კი - ბოლოზე. ერთს ჩართავ, ცეკვა-თამაში და ზარ-ზეიმია, მეორეს ჩართავ - გლოვაა და მოთქმა. მართალი გითხრათ, არც ერთ ტელევიზიას ვენდობი ბოლომდე და არც - მეორეს, რადგან სამყარო და მისი ნაწილი - ჩვენი ცხოვრება სხვადასხვა ფერებისგან შედგება. ტელევიზიამ გაკეთებულიც უნდა გვაჩვენოს, გასაკეთებელიც და გაფუჭებულიც.