იგი თავს მხოლოდ ამერიკაში გრძნობს კარგად

"ჯორჯიან თაიმსი" ესაუბრება "ქართული აკადემიის" წევრს, მწერალ ზაზა მრელაშვილს, რომელიც მომავალ არჩევნებზე და მოსალოდნელ შედეგებზე გამოთქვამს როგორც საკუთარ, ასევე "ქართული აკადემიის" აზრს. ასევე ინტერვიუდან შეიტყობთ, თუ რატომ უჭერს მხარს ადგილობრივ თვითმმართველობის არჩევნებში მიხეილ სააკაშვილის მიერ "ჩარეცხილი" საზოგადოება ირაკლი ალასანიას.

_ ბოლო დროს თქვენი ორგანიზაცია აღარ ჩანს ისე აქტიურად, როგორც უწინ, ხომ არ დაიღალეთ ბრძოლით და, როგორია თქვენი სამოქმედო გეგმა უახლოეს მომავალში?

_ თუკი თქვენ აქტიურობაში ინიციატივიანობას გულისხმობთ, ეს სულ სხვა საკითხია. პოლიტიკურ ბრძოლაში, უმეტეს შემთხვევაში, ინიციატივას მაინც პარტიებს ვუთმობთ, რადგან პოლიტიკა, ძირითადად, მაინც მათი საქმეა. მათ უნდა წარმართონ საქმიანობა ამ მხრივ, ხოლო ჩვენნაირმა საზოგადოებამ მხარი ან უნდა დაუჭიროს, ან არ უნდა დაუჭიროს. კაცმა რომ თქვას, არც "ქართული აკადემია" მდგარა მთლად უქმად. ჩვენ უამრავი ინიციატივით გამოვედით, რაც ჯეროვნად შეფასდა ქართული საზოგადოების მიერ და სწორედ ამიტომაც ვიქეცით საქართველოში მოქმედ ერთ-ერთ ავტორიტეტულ ორგანიზაციად.

რაც შეეხება დაღლას, რანაირად შეიძლება დაიღალო ნორმალური კაცი, როდესაც ხედავ, თუ როგორ თანდათან გეცლება სამშობლო ხელიდან!.. 

_ ვის დაუჭერს მხარს ადგილობრივი თვითმმართველობის არჩევნებზე მიხეილ სააკაშვილის მიერ "ჩარეცხილი" საზოგადოება?

_ ამ კუთხით ჩვენი პოზიცია საზოგადოებისთვის უკვე ცნობილია. "ქართული აკადემია" მხარს უჭერს "ალიანსს" და ირაკლი ალასანიას, თუმცა ეს არ გახლავთ რაიმე უცნაური ახირება ან კაპრიზი. მიუხედავად იმისა, რომ ირაკლი მართლაც ჭკვიანი, განათლებული და გაწონასწორებული პიროვნება და პოლიტიკოსია, ჩვენ მხოლოდ ამიტომ არ დავმდგარვართ მის გვერდით. მისდამი ჩვენი სიმპათია პოლიტიკაში შექმნილმა ვითარებამ და სხვა ფაქტორებმაც განაპირობა _ მისმა რეიტინგმა, გარემოცვამ, მისადმი საზოგადოების ნდობის მაღალმა დონემ. ჩვენ ბევრი ვიფიქრეთ და ვიმსჯელეთ, სანამ ამას გადავწყვეტდით და მიგვაჩნია, რომ პოლიტიკურად გამართლებული ნაბიჯი გადავდგით, როდესაც მომავალ არჩევნებში ოფიციალურად მხარი დავუჭირეთ ირაკლი ალასანიას. თუმცა ეს ისე არ მიიღოთ, თითქოს "ქართულ აკადემიას" მასთან ფანატიზმის ჯაჭვი აკავშირებდეს. თუკი თავის მიერ არჩეულ გზას, მრწამსს და საკუთარ სამოქმედო პროგრამას გადაუხვევს, რაც შემდგომში ვნებას მიაყენებს ქვეყანას, ჩვენ მისი ოპოზიციაც გავხდებით და, რაც სათქმელი იქნება, მასაც ისევე ვეტყვით, როგორც დღეს სააკაშვილს ვეუბნებით.

_ პიარის თვალსაზრისით ხომ არ აგებს ხელისუფლებასთან ოპოზიცია?

_ სამწუხაროდ, უნდა ვაღიაროთ, რომ სააკაშვილის ხელისუფლება, სხვა "სიკეთეებთან" ერთად, მართლაც მშვენივრად ფლობს პიარტექნოლოგიას. მას ამაში საკუთარი მედია და უზურპირებული ბიუჯეტიც უწყობს ხელს. მის განკარგულებაშია თითქმის ყველა ის ბერკეტი, რომელმაც პიარტექნოლოგიური საქმიანობა უნდა წარმართოს არჩევნების დროს. პოლიცია, სამინისტროები, გამგეობები, უმაღლესი სასწავლებლები, სკოლები. თქვენ წარმოიდგინეთ, უცხოეთიდანაც თავიანთი მომხრე დამკვირვებლები და ე.წ. ეგზიტპოლისტები ჩამოჰყავთ. აბა, რა უნდა დაუპირისპირო ამ უზარმაზარ მანქანას _ მწირი ბიუჯეტი? უუფლებობა? არცერთი ბიზნესმენი ოფიციალურად არ აფინანსებს ოპოზიციურ პარტიებს მთელი რიგი მიზეზების გამო. ამაზე უფრო არასახარბიელო საარჩევნო გარემოს სხვაგან სად ნახავთ?

ამას გარდა, მათ მიერ წარმოებული პიარი, ჩემი აზრით, გათვლილია პოლიტიკურად ახლომხედველ, ზერელე ადამიანებზე და არა ინტელექტუალებზე და ანალიტიკოსებზე. ამ ორ უკანასკნელზე მათ ხელი აქვთ ჩაქნეული, იციან, რომ მათ გულს მაინც ვერ მოიგებენ. ამიტომ ფსონს დედაქალაქის პერიფერიებსა და რაიონებზე დებენ, სადაც ასფალტის დაგება, შადრევნისა და ხიდის აგება, სათამაშო მოედნების მოწყობა, შუშის შენობების აღმართვა, უფასო კონცერტებისა და საარაკო ფოიერვერკების მოწყობა საერთო-სახალხო გამარჯვებად თუ მიღწევებად აღიქმება. იციან, რომ ამისთანა ადამიანებისთვის ე.წ. ვიზუალური "პერფორმანსები" ბედნიერებისა და კეთილდღეობის ილუზიას ქმნის და შედეგად ეს ხალხიც ისეთ ვირტუალურ ნირვანაში იმყოფება, საიდანაც თავის დაძვრენა ძალიან ძნელია. ტელევიზიაში ყველაზე ხანგრძლივი სარეკლამო დრო გიგი უგულავას საპიარო კადრებს ეთმობა და, თანაც, იმ ფონზე, როდესაც ახალი ხიდი იგება, ახალი სათამაშო მოედანი იხსნება, რომელიმე სახლს ახალი სახურავი უკეთდება. ესე იგი, მისი მოღვაწეობა ამ ვირტუალურ სამყაროში დაკავშირებულია სიახლესა და აღმშენებლობასთან! ამასთან, თვითონაც "სიამოვნებით" იღებს მონაწილეობას საქმეში, ასხამს ბენზინს ბენზინგასამართ სადგურებში, აცხობს პურს ფურნეებში, აეროპორტში ბარგსაც ეზიდება... რა არის ეს? მასხარაობა? აფერისტობა? ვინ უნდა მოატყუოს ყოველივე ამით? რა თქმა უნდა, გულუბრყვილო და მიამიტი მოსახლეობა, რომელსაც შესაძლოა, მართლა სჯერა ამ ფარსისა. სინამდვილეში კი, საქართველო, მთელი ამ ბრჭყვიალა ხარახურიანად, ამ შადრევნებიანად, ხიდებიანად, შოუ-კონცერტ-ფოიერვერკებიანად, ხატოვნად რომ ვთქვათ, მაგონებს ერთ მადისაღმძვრელ გარგარს, რომელსაც გახლეჩ და... კაი ჩასუქებულ მატლს და მის ყავისფერ პატივს ჰკიდებ თვალს! აი, ასეა დღეს საქართველო, გარედან ლამაზი, ხოლო შიგნიდან _ ლპობის გზას მდგარი და უპერსპექტივო. ასეთ ქვეყანას და მის მესვეურებს აპიარებს დღეს ხელისუფლება. ამაში კი მართლაც "მაგრები" არიან, თუმცა, მოგეხსენებათ, გასაგების გამგები ყოველთვის არსებობს და ოპოზიციის პიარიც, ასე თუ ისე, თავის საქმეს მაინც აკეთებს.

_ რა შეიძლება მოჰყვეს არჩევნების გაყალბებას და როგორი იქნება თქვენი პოზიცია?

_ ზუსტად ვერ გეტყვით, მაგრამ ისტორიულად უსამართლობას რაც მოჰყოლია საქართველოში, მშვენივრად იცით. რას-რას და, ქართველი კაცი რომ ყველაზე ძნელად უსამართლობას ეგუებოდა ოდითგანვე, ეს აღიარებული და ფაქტებით განმტკიცებული ჭეშმარიტებაა. არჩევნების გაყალბებას შეიძლება ყოველგვარი უარყოფითი მოვლენების მთელი გრადაცია მოჰყვეს, მაგრამ ღმერთმა დაგვიფაროს და, აქაც "ბიშკეკიზაციის" პროცესები არ განვითარდეს! ამას საქართველო უკვე ვეღარ გადაიტანს. ჩვენ ბევრი რამ გამოვცადეთ და გადავიტანეთ ამ ოცი წლის განმავლობაში. 90-იანების წყვდიადისა და განუკითხაობის პერიოდის დაბრუნება ჭკუათმყოფელ ადამიანს როგორ უნდა უნდოდეს? ყველაფერი ცივილიზებული წესებითა და კანონებით უნდა მოხდეს. გამწარებულმა ხალხმა შეიძლება ყველა ზღვარს გადააბიჯოს, უკიდურეს ხერხებსაც კი მიმართოს ამ ხელისუფლების მოსაშორებლად, თუმცა "ქართული აკადემიის" არჩევანი ამ შემთხვევაშიც სიმართლის მხარეს დგომა იქნება და არა სიმრავლისა.

_ მიხეილ სააკაშვილი თითქმის ერთი თვის განმავლობაში საქართველოში არ იმყოფებოდა. ზოგიერთის ინფორმაციით, იგი ობამასთან უშედეგოდ ცდილობდა შეხვედრას. ასევე ვრცელდებოდა ინფორმაცია, თითქოს ის მანამ არ დაბრუნდებოდა საქართველოში, სანამ მმართველობის გახანგრძლივების გარანტიებს არ მიიღებდა. რა მოხდა სინამდვილეში, ჩვენს მიტოვებას ხომ არ აპირებდა პრეზიდენტი?

_ მიტოვებას? ეგ რას მიგვატოვებს? სანამ იმ პროექტს არ დაამთავრებს, რომელიც ამერიკისა და რუსეთის მიერ შემუშავდა, თავს არ გაგვანებებს. უბრალოდ, მას მეტისმეტად უყვარს თავისი სამშობლო _ ამერიკა _ და იქ ყოფნა მისთვის მშობლიური სტიქიაა. ხომ ნახეთ, როგორ საუბრობდა იგი ამერიკულ პუბლიკასთან? აბა, დააკვირდით, რა თავისუფლად და უშფოთველად "აბოლებდა" იქაურ მსმენელს თავისი ცნობილი ტყუილებით, როგორ არაქართულ მიმიკასა და ჟესტიკულაციას იყენებდა. მოკლედ, თავის სტიქიაში იყო. აქ კი, საქართველოში, იგი ყოველთვის დაძაბული და განერვიულებულია, ამას მისი ცნობილი ნაძალადევი ღიმილიც კი ვერ ფარავს. გამოცდილი თვალი მშვენივრად შეამჩნევს, რომ ამ ბოლო 3-4 წლის განმავლობაში საქართველოში ცხოვრება მისთვის მხოლოდ მსახიობობა, ნერვიულობა და სტრესია.

ამას გარდა, სააკაშვილს თავმოყვარეობის ამბავშიც ვერა აქვს საქმე კარგად. ნახა, რომ ობამა არ შეხვდა ისე, როგორც საჭირო იყო. შე კაი კაცო, დაადე თავი და ჩამოდი, აქ ნაკლები საქმე გაქვს საკეთებელი? მაგრამ, ნურას უკაცრავად! ლექციები ვიღას წაუკითხოს საქართველოში დავანებული მეტა-დემოკრატიის, აღორძინებული ეკონომიკის, ზღაპრული კეთილდღეობის შესახებ? სანამ უკანასკნელ ფერმის გამგეს, პროფილაქტიკათა სინდიკატის უფროსს, ან მეთევზეთა ასოციაციის თავმჯდომარეს არ შეხვდებოდა და ლექციებს არ წაუკითხავდა სიღნაღისა და ბათუმის განახლებაზე, მანამდე მიშა არც ჩამოვიდოდა ამერიკიდან. ახლა, როგორც იქნა, ეღირსა ჩამობრძანება. ქუთაისში, ტენისის კორტებზე წაუკუნტრუშებია ცოტა.

_ უკანასკნელ ხანს ხშირად საუბრობენ მის არამყარ ფსიქიკურ მდგომარეობაზე, მართლაც ხომ არ გაგვიგიჟდა პრეზიდენტი?

_ ეგ ექიმებს უნდა ჰკითხოთ. ისე კი, შედით "იუთუბ"-ის ვებგვერდში და იქ იხილეთ მისი განუმეორებელი სიცილი, საეჭვო მანერები და არაადეკვატური საუბრები.

_ შესაძლებელია, ახლო მომავალში, საქართველოში დაუშვან ერთსქესიანი ქორწინება. რა აზრი გაქვთ ამასთან დაკავშირებით?

_ როგორი ლირიკული გადახვევაა... აბსოლუტურად იგივე აზრი მაქვს, რაც გულაშვილსა და უნგიაძეს. ამგვარ ქორწინებას საქართველოში არავინ დაუშვებს. ეს არის გახრწნილობისა და ამორალიზმის უმაღლესი კატეგორია. პირადად ვერასდროს შევეგუები ამას, ვინაიდან აქედან დაიწყება ჩემი, როგორც ჯანსაღი ადამიანის ისედაც შელახული უფლებების სამუდამო დასამარება. საერთოდ არ მსურს ამაზე საუბარი...