აღნიშნულთან დაკავშირებით დღეს მთავარ პროკურატურაში გამართულ ბრიფინგზე განაცხადეს.

მათი ინფორმაციით, მოსამართლის დაკავების, მისი ბინის, სამუშაო ადგილის, პირადი ჩხრეკისა და აღკვეთის ღონისძიების - დაპატიმრების შეფარდების შესახებ თანხმობა საქართველოს მთავარი პროკურორის წინადადების საფუძველზე, საქართველოს უზენაესი სასამართლოს თავმჯდომარემ გასცა.

"საქართველოს შინაგან საქმეთა სამინისტროს კონსტიტუციური უსაფრთხოების დეპარტამენტში წინასწარი გამოძიება თაღლითობის ფაქტზე დაიწყო, დანაშაული გათვალისწინებული საქართველოს სისხლის სამართლის კოდექსის 180-ე მუხლის მე-3 ნაწილის "ბ" ქვეპუნქტით. 12 მაისს კი შემდგომი გამოძიების ჩასატარებლად საქმე საქართველოს მთავარ პროკურატურაში გადაიგზავნა, რადგან მოსამართლის მიერ ჩადენილი დანაშაული გამოიკვეთა", - განაცხადეს პროკურატურაში.

მათივე განმარტებით, საქმეზე ჩატარებული წინასწარი გამოძიებით დადგინდა, რომ ახალციხის რაიონული სასამართლოს მოსამართლე ცირა მაისურაძე, 2010 წლის 4 იანვრიდან მივლინებული იქნა თბილისის საქალაქო სასამართლოს სამოქალაქო საქმეთა კოლეგიაში მოსამართლის უფლებამოსილების განსახორციელებლად. ცირა მაისურაძე განსასჯელებს - შალვა კოღუაშვილსა და ს/ს "თბილსრესის" სხვა თანამშრომლებს დაპირდა, რომ დაეხმარებოდა საპროცესო შეთანხმების დადებაში და ამ მიზნით საქმეში ჩართო ადვოკატი რომან ნერგაძე. რამდენიმე დღეში ცირა მაისურაძე შეხვდა შუამავალს ლაშა გაგნიძეს და მოსთხოვა 5.000 დოლარის გადახდა, რომელიც ვითომდა სჭირდებოდა ახალციხეში მყოფი უცნობი პირისთვის გადასაცემად, რათა მას ზემოქმედება მოეხდინა კონსტიტუციური უსაფრთხოების დეპარტამენტის თანამშრომლებზე, რომლებიც არ იქნებოდნენ განსასჯელ პირებთან საპროცესო შეთანხმების დადების წინააღმდეგი.

შეხვედრიდან მეორე დღეს ლაშა გაგნიძემ ცირა მაისურაძეს გადასცა მოთხოვნილი თანხა. მითითებული თანხის მიღებიდან ხუთი დღის გასვლის შემდეგ ლაშა გაგნიძემ ცირა მაისურაძეს, ამ უკანასკნელის მოთხოვნის საფუძველზე, თითქოსდა პროკურორ კოჭლამაზაშვილისთვის გადასაცემად კვლავ მიუტანა 3.000 დოლარი. გარდა ამისა, ცირა მაისურაძემ ლაშა გაგნიძეს, ვითომდა მოსამართლისათვის გადასაცემად მოსთხოვა კიდევ 10.000 დოლარის გადახდა.

ს/ს "თბილსრესის" გაკოტრების მმართველმა დავით ჩაჩხიანმა, რომელიც ცირა მაისურაძისთვის და ადვოკატ რომან ნერგაძისთვის გადასაცემად თანხებს აძლევდა შუამავალ ლაშა გაგნიძეს, მას შემდეგ რაც დარწმუნდა, რომ გარდაბნის რაიონულ სასამართლოში მიმდინარე პროცესზე ს/ს "თბილსრესის" თანამშრომლებთან არ გაფორმდა საპროცესო შეთანხმება, განცხადებით მიმართა კონსტიტუციური უსაფრთხოების დეპარტამენტს, რის საფუძველზეც აღიძრა სისხლის სამართლის საქმე.