"ყოფილ საბჭოთა კავშირის ქვეყნებში მომხდარი "ფერადი" რევოლუციებიდან ხუთი წლის შემდეგ, კრემლს, როგორც იქნა რევანშის აღების შანსი გაუჩნდა. შესაძლოა უახლოეს მომავალში რუსეთის ხელისუფლება შეძლებს დაამხოს მეზობელი სახელმწიფოების კიდევ ორი ლიდერი _ მიხეილ სააკაშვილი და ალექსანდრე ლუკაშენკო", _ წერს ჟურნალი.

გამოცემა აღნიშნავს, რომ, რუსეთს ამისათვის უკვე კარგი შედეგები და ნიადაგი აქვთ: უკრაინასა და ყირგიზეთში შეცვლილი ხელისუფლებების სახით. "შეუძლებელია ითქვას, რომ ამ ქვეყნებში ხელისუფლების ცვლილების მხოლოდ და მხოლოდ ერთი ორგანიზატორი მოსკოვი იყო, მაგრამ მოსკოვმა მაინც გადამწყვეტი როლი ითამაშა მომხდარში და სწორედ ეს აქეზებს კრემლს ახალი მცდელობების განხორციელებაში _ შეცვალოს ხელისუფლება იქ რასაც ისინი "ახლო საზღვარგარეთს" უწოდებენ".

"Newsweek"-ის მიიჩნავეს, რომ კრემლის #1 სამიზნე _ საქართველო და მისი პრეზიდენტი მიხეილ სააკაშვილია. რუსი პოლიტოლოგი სერგეი მარკოვი აცხადებს, რომ მოსკოვი საქართველოში "მეორე ბიშკეკს" ამზადებს. "და რუსი დეპუტატის სიტყვებში სიმართლის მარცვალი მართლაც არის", _ აღნიშნავს გამოცემა და იქვე აგრძელებს, რომ კრემლი ღიად ალაგებს ურთიერთობებს ქართულ ოპოზიციასთან. 9 მაისს გამარჯვების დღისადმი მიძღვნილ საზეიმო ღონისძიებებზე რუსეთის პრემიერ-მინისტრი ვლადიმერ პუტინი გვერდიგვერდ იდგა ქართული ოპოზიციის ლიდერთან ნინო ბურჯანაძესთან. მათ ასევე ერთად ჩაუყარეს საფუძველი მემორიალის მშენებლობას მოსკოვში.

სტატიაში ასევე ნათქვამია, რომ საქართველოს პრეზიდენტმა მიხეილ სააკაშვილმა უკვე გააკეთა განცხადება იმასთან დაკავშირებით, რომ რუსეთს ყოფილი საბჭოთა კავშირის ტერიტორიაზე მოქმედების განუსაზღვრელი უფლება აქვს და იგი ერთი მეორის მიყოლებით ამხობს მეზობელ სახელმწიფოებში არსებულ დემოკრატიულ რეჟიმებს. "როგორც ჩანს მას ყირგიზული სცენარის საქართველოში განმეორების მართლაც ეშინია", _ წერს გამოცემა.

"სააკაშვილისათვის გადამწყვეტი გამოცდა მაისის ბოლოს დაგეგმილი თბილისის მერის არჩევნები იქნება. ამ არჩევნებზე მოქმედი მერის წინააღმდეგ იბრძვის სააკაშვილის ყოფილი მომხრე, ოპოზიციონერი ირაკლი ალასანია", _ წერს გამოცემა და ოპოზიციის კიდედ ერთი წარმომადგენლის ზურაბ ნოღაიდელის სიტყვები მოჰყავს: "სააკაშვილი ყველაფერს აკეთებს იმისათვის, რომ გააყალბოს არჩევნები და თუ იგი ამას გააკეთებს ინანებს. ჩვენ ბუნტს მოვაწყობთ".

გამოცემა ასევე აღნიშნავს, რომ მოსკოვზე ასეთი აშკარა ორიენტაცია ოპოზიციისათვის შესაძლოა საშიში სტრატეგია აღმოჩნდეს.

"საქართველოში ახლახანს ჩატარებულმა გამოკითხვამ ცხადჰყო, რომ მოსახლეობის 52 % ამართლებს საქართველოს ხელისუფლების მიერ რუსეთის მიმართ გატარებულ პოლიტიკას. მიუხედავად ამისა, კრემლი თავისი სტრატეგიის ერთგული რჩება _ იგი ქმნის და აძლიერებს თავისი მტრების მოწინააღმდეგე დაჯგუფებებს", _ აღნიშნულია სტატიაში..

სტატიის მიხედვით, საქართველოს შემდეგ სიაში შესაძლოა ბელორუსი იყოს. კრემლმა უკვე იპოვა იქ თავისი ადამიანი, ადგილობრივი ოპოზიციონერი ანდრეი სანნიკოვი.