Powered by Jasper Roberts - Blog

15:19 17.06.2017
საქართველოს მორაგბეთა ეროვნული ნაკრები აშშ-ის ნაკრებს დაუპირისპირდება

საქართველოს მორაგბეთა ეროვნული ნაკრები ამერიკული ტურნეს ფარგლებში მეორე შეხვედრას სტუმრად აშშ-ის ნაკრების წინააღმდეგ ჩაატარებს. "ბორჯღალოსნებისა" და "არწივების" ტესტ-მატჩი ჯორჯიის შტატის ქალაქ კენესოში, 18 ივნისს, თბილისის დროით, ღამის 03:00 სთ-ზე დაიწყება და მის პირდაპირ ტელერეპორტაჟს "პირველი არხი" წარმოადგენს.



საქართველოს ნაკრებმა ივნისის ტესტ-სერიის პირველი შეხვედრა სტუმრად კანადაში მოიგო - 13:0, ხოლო ამერიკელები ნიუ-ჯერსიში ირლანდიას დაუპირისპირდნენ და ანგარიშით 19:55 დამარცხდნენ.



Fifth Third Bank Stadium-ზე გასამართი შეხვედრის წინ "ბორჯღალოსნების" მთავარმა მწვრთნელმა მილტონ ჰეიგმა სამატჩო რაზმი დაასახელა, რომელშიც სამი ცვლილებაა. კანადასთან დაშავებული ანტონ ფეიქრიშვილისა და გიორგი თხილაიშვილის ნაცვლად, თამაშს ლევან ჩილაჩავა და ვიტო კოლელიშვილი დაიწყებენ. გარდა ამისა, გარემარბად თავიდანვე ითამაშებს გიორგი კოშაძე, რომელმაც იოსებ მათიაშვილი შეცვალა. სამი ახალი სახეა თადარიგშიც. ჯაბა ბრეგვაძის შემცვლელად, ბადრი ალხაზაშვილის ნაცვლად, შალვა მამუკაშვილი ეყოლება. თამაშში მოგვიანებით ჩაერთვებიან ახალგაზრდა ბურჯი თორნიკე მატარაძე და ახალგაზრდა მესამეხაზელი გიორგი ცუცქირიძე. აღსანიშნავია, რომ აშშ-ის ნაკრებთან მატჩი საიუბილეოა "ბორჯღალოსნებისა" და "მონპელიეს" მეორეხაზელისთვის - კოტე მიქაუტაძისთვის, რომელიც 50-ე კეპს მოიხვეჭს. მისი სანაკრებო დებიუტი 2010 წელს ბუქარესტში, შოტლანდიის "ა" ნაკრებთან შედგა, 2013 წლიდან კი ნაკრების უცვლელ წევრად იქცა. განვლილ 49 მატჩში კოტემ 2 ლელო დადო.



საქართველოსა და აშშ-ის ნაკრებები ერთმანეთს აქამდე ოთხჯერ დაუპირისპირდნენ, სამჯერ გამარჯვება "არწივებს" დარჩათ, ერთი მოგებაა "ბორჯღალოსნების" აქტივში. 

2009 წელს "ჩერჩილის თასზე" ამერიკელებმა 31:13 მოგვიგეს, 2010-ში კი თბილისში გამართულ ნოემბრის ტესტ-მატჩში 19:17 ვაჯობეთ. მომდევნო ორ დაპირისპირებაში გამარჯვება აშშ-ს დარჩა. 2012 წლის ივნისის ტესტებზე 36:20 გძლიეს, 2013 წლის ნოემბრის ტესტებზე კი - 25:23.

ავტორ(ებ)ი : interpressnews.ge