Powered by Jasper Roberts - Blog

15:00 13.09.2017
14 სექტემბერს საეკლესიო ახალი წელი აღინიშნება

14 სექტემბერს საეკლესიო ახალი წელი აღინიშნება. როგორც საპატრიარქოდან გვაცნობეს, ამასთან დაკავშირებით ხვალ, 09:00 საათზე, სრულიად საქართველოს კათოლიკოს-პატრიარქი, უწმინდესი და უნეტარესი, ილია მეორე სიონის ღვთისმშობლის მიძინების სახელობის ტაძარში პარაკლისს გადაიხდის.


ამასთან, ხვალიდან სასულიერო სემინარიასა და აკადემიაში ახალი სასწავლო წელი დაიწყება. პატრირქი ტაძარში შეკრებილ სტუდენტებსა და პედაგოგებს ახალი სასწავლო წლის დაწყებას მიულოცავს.



მართლმადიდებელი ეკლესია 14 სექტემბერს ინდიქტიონის, ანუ ეკლესიური ახალი წლის დაწყებას აღნიშნავს. ამ დღეს წმიდა ეკლესია "ყოვლისა დაბადებულისა შემოქმედს" შესთხოვს, "აკურთხოს გვირგვინი წელიწადისა". 



ეკლესიაში ახალი სტილით 14 სექტემბრიდან წელიწადის ათვლა უძველესი დროიდან მოდის. სავარაუდოდ, იგი პირველი მსოფლიო კრების გადაწყვეტილებას უკავშირდება და მისი აღნიშვნა ორმა მოვლენამ განაპირობა. 



წმინდა სახარების მიხედვით, ამ დღეს ნაზარეთში მყოფი მაცხოვარი სინაგოგაში შევიდა და ესაია წინასწარმეტყველის სიტყვები წაიკითხა: "სული უფლისაჲ ჩემ ზედა, რომლისათვის მცხო მე ... ქადაგებად წელიწადი უფლისა შეწყნარებული". 



ასევე, 312 წლის 14 სექტემბერს კონსტანტინე დიდმა დაამარცხა მაქსენციუსი, რის შემდეგაც ქრისტიანებს სარწმუნოების აღსარების სრული თავისუფლება მიენიჭათ.

ავტორ(ებ)ი : geotimes.ge