"ნაციონალური მოძრაობის" ნაძალადევის რაიონის დეპუტატობის კანდიდატს, მერაბ სამადაშვილს, თავისი ამომრჩეველი ამომრჩევლების მასობრივად მოსყიდვასა და "შავ სამყაროსთან" ურთიერთობაში ადანაშაულებს. სამადაშვილი კი ბრალდებებს უარყოფს და საკუთარი არგუმენტები მოჰყავს.

_ ვინ არის "გუგულა", ბატონო მერაბ?

_ ჩემი მეგობარი, ერთ-ერთი სპორტული სკოლის დამფუძნებელი მამუკა გუგეშაშვილი.

_ სანზონაში ამ თქვენს მეგობარს აიგივებენ შავ სამყაროსთან. წინასაარჩევნოდ სხვა პარტიების აგიტატორებს კი არ აკარებენ იმ უბნებს, რომლებიც ამ "გუგულას" ეკუთვნის. ხშირად გაიგონებთ ასეთ ფრაზებს: "კირპიჩკა" "გუგულასია", ფანტანების უბანი "გუგულასია", "პლატონას დუქანი" "გუგულასია". ეს "გუგულა" კი თქვენსა და ქუჩის სამყაროს შუამავლად მოიაზრება, ერთი სიტყვით, მისი ნებართვის გარეშე ამ უბნებში არაფერი ხდებაო...

 _ ის არის ჩემი ინსტიტუტის ჯგუფელი, ვარ მისი ბავშვის ნათლია, ერთი სიტყვით, ოჯახებით ვმეგობრობთ. ნაძალადევში კი ბიჭი რომ ქუჩაში დადგება, ყველა ძველი ბიჭი ჰგონიათ. ადამიანი, რომელიც ბავშვების აღზრდით არის დაკავებული, ძველი ბიჭი ვერ იქნება. მას ბევრი სიკეთე აქვს გაკეთებული უამრავი ადამიანისთვის და არასოდეს ნდომებია დეპუტატობა. ესეც პოლიტიკური მომენტია, ადამიანები, რომლებიც ჩემთან ახლოს არიან, რატომღაც პოლიტიკასთან ასოცირდებიან, არადა, ეს ასე არ არის.

 _ ამბობენ, რომ გარკვეული ხმების სანაცვლოდ ნაძალადევში ვიღაცებს ციხიდან გამოსვლას ან სასჯელის განახევრებას ჰპირდებით. რადგან ეს ნაძალადევია, რაიონში ეს დაპირება დიდი პოპულარობით სარგებლობს...

_ მე პროკურორად არ მირჩევენ და არც იურისტი ვარ. თუ მომმართავს მოსახლეობა მსჯავრდებულის დახასიათებით და ხელმოწერით, როგორც დეპუტატი, ვალდებული ვარ დავეხმარო. ხშირად შემომდიოდა 200-500-კაციანი ხელმოწერები და მაშინ არჩევნები არ იყო. მე ხომ ყველას არ ვიცნობ, ხელმოწერებიც იმიტომ მჭირდება, რომ მსჯავრდებულზე წარმოდგენა შემექმნას. უარესს გეტყვით, გუშინ შეხვედრაზე მეუბნებიან, რომ თურმე ბარბარეს ეკლესიას წყალი გადავუკეტე და ეს იმიტომ, რომ ჩემი მეგობრები კინოთეატრ "საქართველოს" აკეთებენ. ალბათ, ამ თემას მოძღვრები გამოეხმაურებიან, მაგრამ ეს ყველაფერი წინასაარჩევნოა და მწყინს, რომ ამისთვის ეკლესიას იყენებენ. ვერავინ იტყვის, რომ ეკლესიის სახელით რომელიმე არჩევნებში მისარგებლია.

_ რატომ _ თქვენი მეგობრები, ამ უბანში ყველამ იცის, რომ ეს კინოთეატრი თქვენ შეიძინეთ...

 _ ეს კინოთეატრი არის სახელმწიფოსი და არავის შეუსყიდია. წინა მოწვევის პარლამენტში რომ მირჩევდნენ, მოსახლეობას დავპირდი, რომ ამ კინოთეატრს გავარემონტებდი და დაპირება შევასრულე.

_ თქვენი შტაბი იქ არ გადადის?

 _ არა, როგორ გეკადრებათ, შეიძლება კლუბი გამოვიყენოთ, თორემ ჩემი შტაბი აქ რჩება. საკუთრება ჩემი არ არის, არც ჩემი მეგობრების, თუ ასე იქნებოდა, დასამალიც არაფერი გვექნებოდა. სამეწარმეო საქმიანობას არ ვეწევი მას შემდეგ, რაც დეპუტატი გავხდი. კომპანიები კი, რომლებიც მანამდე დავაარსე, დღესაც მუშაობს.

 _ ყველაფერ ამის შემდეგ რას იტყვით, როგორია თქვენი შანსი ამ არჩევნებზე, ვინ არის თქვენი ყველაზე რეალური კონკურენტი?

 _ ჩემი შანსები რეალური რომ არ იყოს, ეს კითხვები არ იქნებოდა. სხვაზე ჯერ არაფერს საუბრობენ.

_ უკვე მესამე მოწვევის პარლამენტში აპირებთ შესვლას, იყავით ვიცე-სპიკერიც, მაგრამ პოლიტიკურად აქტიური მერაბ სამადაშვილი თითქმის არ გვინახავს, რას იტყვით ამის შესახებ?

_ ალბათ, ყველა რაღაცით გამოირჩევა, ესეც განსაკუთრებული ნიშანია. მთავარია, ჩვენ ვაკეთებდეთ საქმეს და გვქონდეს ამის საშუალება.