ალექსანდრე გაბუევი, ნატალია პორტიაკოვა ავტორები ის რუსი ჟურნალისტები არიან, რომლებიც საქართველოს ხელისუფლებამ, სხვებთან ერთად, თბილისში მოიწვია სიტუაციის უკეთ გასაცნობად და საქართველოს ირგვლივ მიმდინარე მოვლენების ობიექტურად გასაშუქებლად.

პუბლიკაციაში გადმოცემულია თავდაცვის მინისტრთან დავით კეზერაშვილთან უკვე ცნობილი შეხვედრის დეტალები თბილისში (“მან დაუფარავი სიამაყით მოგვითხრო სამხედრო რეფორმის შედეგებზე ქართულ ჯარში, გვითხრა, რომ საქართველოს ომის დაწყება არ სურს, რომ კოდორის ხეობაში არავითარი ქართული სამხედრო ქვედანაყოფები არ იმყოფებიან და რომ აფხაზებს 4 მაისს ქართული “დრონის” ჩამოგდება მხოლოდ მოელანდათ… ისე, საქართველოს სრული უფლება აქვს ჰაერიდან გააკონტროლოს თავისი ტერიტორია, მოსკოვის შეთანხმებაში კი უპილოტო თვითმფრინავების ფრენის აკრძალვაზე არაფერია ნათქვამი”:), აგრეთვე პრეზიდენტთან მიხეილ სააკაშვილთან ბათუმში (“პრეზიდენტმა ემოციურად მოგვიყვა თავის გეგმებზე, რომელიც ბათუმის სინგაპურად გადაქცევას ითვალისწინებს, ხოლო ფოთი მეორე დუბაი იქნება…

 რაც შეეხება უპილოტოების ჩამოგდებას, სააკაშვილმა გვითხრა, რომ აფხაზები ხშირად ტყუიან - მათ ოჩამჩირეში 4 მაისს არავითარი თვითმფრინავი არ ჩამოუგდიათ… “20 აპრილს ჩამოგდებულის შესახებ ვიდეო რომ ვნახე, საწყალ ძროხას რუსული გამანადგურებელი როგორ აგდებს, მე ამაზე პუტინს ვუთხარი, რომ ეს ახალშობილის ცემას ჰგავს-მეთქი”.

პრეზიდენტმა აღიარა: “ჩვენ რამდენიმე დღის წინ ომის ზღვარზე ვიდექით და დღეს ეს საშიშროება ჯერ კიდევ არსებობს… საქართველო რუსეთთან ომისათვის მზად არ არის ადა არც არასოდეს იქნება - ჩვენ არ გვყავს იმდენი ბრძოლისუნარიანი ნაწილი და ამაში არც ნატო არ დაგვეხმარება”).