პარლამენტი დღევანდელ პლენარულ სხდომაზე ,,ოკუპირებული ტერიტორიების შესახებ" კანონპროექტს მეორე მოსმენით განიხილავს.
კანონპროექტში ჯერჯერობით ღიად რჩება მე-6 მუხლი, რომელიც ოკუპირებეულ ტერიტორიებზე ეკონომიკური საქმიანობის აკრძალვას ეხება.

აღნიშნულ მუხლზე მსჯელობა დღეს თავდაცვისა და უშიშროების საპარლამენტო კომიტეტშიც გაგრძელდება. იმ შემთხვევაში კი, თუ დეპუტატები ბოლომდე ვერ ჩამოყალიბდებიან, კანონპროექტს მეორე მოსმენით აღნიშნული მუხლის გარეშე მიიღებენ.

,,ოკუპირებული ტერიტორიების შესახებ" კანონპროექტი ითვალისწინებს რუსული არმიის მიერ ოკუპირებული ტერიტორიებისთვის სამართლებრივი სტატუსისა და სამართლებრივი რეჟიმის განსაზღვრას, რაც აფხაზეთის ავტონომიური რესპუბლიკის და ყოფილი სამხრეთ ოსეთის ავტონომიური ოლქის ტერიტორიებზე გავრცელდება. ეს სტატუსი ვრცლდება ასევე შავი ზღვის აკვატორიის იმ მონაკვეთზე, რომელიც აფხაზეთის ტერიტორიას ესაზღვრება. აღნიშნული რეჟიმი ოკუპირებულ ტერიტორიებზე საკუთრების უფლების, სამეწარმეო საქმიანობისა და თავისუფალი გადაადგილების უფლების გარკვეულწილად შეზღუდვას გულისხმობს.

,,ოკუპირებული ტერიტორიების შესახებ კანონი" ამ ტერიტორიებზე გამოცხადებული საგანგებო მდგომარეობის შესახებ აქტს ჩაანაცვლებს. თუმცა საგანგებო მდგომარეობა გაგრძელდება ყველა იმ ტერიტორიაზე, რომელიც აფხაზეთისა და ყოფილი სამხრეთ ოსეთის ავტონომიური ოლქის ფარგლებში არ შედის, მაგრამ რუსეთის საოკუპაციო შენაერთები მაინც რჩებიან.

ოკუპირებული ტერიტორიების შესახებ კანონის მოქმედება ოკუპირებულ ტერიტორიებზე საქართველოს ხელისუფლების იურისდიქციის სრულად აღდგენამდე გაგრძელდება.