საქართველოს პრეზიდენტი მიხეილ სააკაშვილი ევროპულ ტურნეში გაემგზავრა, რომლის დროსაც ნორვეგიას, შვედეთს და ბალტიიპირეთის ქვეყნებს ეწვევა.
როგორც ”ახალი ამბები - საქართველოს” პრეზიდენტის ადმინისტრაციაში განუცხადეს, პრეზიდენტს ტურნეში თანხლებას უწევენ ეკონომიკის მინისტრის მოვალეობის შემსრულებელი ეკა შარაშიძე, ენერგეტიკის მინისტრის მოვალეობის შემსრულებელი ალექსანდრე ხეთაგური, რეინტეგრაციის საკითხებში სახელმწიფო მინისტრის მოვალეობის შემსრულებელი თემურ იაკობაშვილი და პარლამენტის წევრები ლაშა ჟვანია და გია არსენიშვილი.
ვიზიტს საქართველოს პრეზიდენტი დღეს ნორვეგიიდან იწყებს. სააკაშვილი შეხვდება ნორვეგიის მეფეს კარლ V-ს, პრემიერ-მინისტრს იენს სტოლტენბერგს, ასევე ნობელის ინსტიტუტში სიტყვით გამოვა და დამსწრე საზოგადოებას ქვეყანაში არსებული ვითარების შესახებ მოუთხრობს.
ვიზიტის მსვლელობისას თანამშრომლობის შესახებ ორმხრივ ხელშეკრულებაზე ხელმოწერა იგეგმება.
პრეზიდენტი და ნორვეგიის პრემიერ-მინისტრი პრესისთვის ერთობლივ განცხადებას გააკეთებენ.
პარალელურად გაიმართება ეკონომიკური ფორუმი, რომელზეც ეკონომიკური განვითარების მინისტრის მოვალეობის შემსრულებელი ეკა შარაშიძე საქართველოში საინვესტიციო გარემოს შესახებ მოხსენებას წარადგენს. რამდენიმე პროექტს ასევე ენერგეტიკის მინისტრის მოვალეობის შემსრულებელი ალექსანდრე ხეთაგურიც წარადგენს.
ხუთშაბათს დილიდან საქართველოს პრეზიდენტი და დელეგაციის წევრები ვიზიტს შვედეთში გააგრძელებენ. სტოკჰოლმიდან მიხეილ სააკაშვილი ბალტიისპირეთის ქვეყნებში გაემგზავრება.
