თბილისში ავტოსადგომებზე პარკომეტრები დაიდგმება.

ვაჟა-ფაშაველას გამზირის 16 ნომერთან დღეს პირველი პარკომეტრი დამონტაჟდა. აღნიშნულ პროცესი ქალაქში კომპანია „სიტი პარკის“ მიერ ხორციელდება.

პარკომეტრის პრეზენტაციას ქალაქის ტრანსპორტის სამსახურის უფროსი აკაკი ჯოხაძე და კომპანიის წარმომადგენელები ესწრებოდნენ.
როგორც „სიტი პარკის“ ექსტლუატაციის მენეჯერის მოადგილემ ირაკლი ჯიბლაძემ განაცხადა, წლის ბოლომდე თბილისში კიდევ 10 პარკომეტრი დამონტაჟდება. სულ დედაქალაქში 3500-დან 5000-მდე ავტოსადგომია შერჩეული და ეს რიცხვი 5 წლის განმავლობაში კიდევ 10 000-მდე გაიზრდება.

ავტოსადგომებზე დაიდგმება პარკომეტრის აღმნიშვნელი სპეციალური ნიშანი. ყველა ადგილზე საათობრივი ანაზღაურება სხვადსახვა იქნება.
თბილისი დაყოფილია გადახდის სამ ზონად. შესაბამისად, ერთი საათით ავტომანქანის გაჩერების ღირებულება 20, 50 თეთრი და ერთი  ლარი იქნება. 

გადახდის პრინციპიც არის სამი სახის. ავტომანქანის მფლობელებს პარკინგისთვის თანხის გადახდა შეეძლებათ მობილური და გადასაფხეკი ბარათებით. ასევე, თავად პარკომეტრის მეშვეობით.

ავტომფლობელების მიერ თანხის გადახდის პროცესს კომპანიის ინსპექტორები გააკონტროლებენ. პირი, რომელიც თანხას არ გადაიხდის,  დაჯარიმდება. კერძოდ, ერთიდან სამ საათამდე ავტომანქანის გაჩერების შემთხვევაში 20 ლარით და, დროის მიხედვით, შესაძლოა, 100 ლარამდეც.

როგორც ირაკლი ჯიბლაძემ განაცხადა, დღეს სისტემის მხოლოდ ტესტირება მოხდება, შემდგომი ერთი თვის განმავლობაში კი იმუშავებს საპილოტე სისტემა.

მისივე თქმით, პარკირების სისტემის ორგანიზება ქალაქისთვის პრიორიტეტულია და იგი ამ მხრივ არსებულ ქაოსს დაარეგულირებს.
კომპანია „სიტი პარკმა“ პარკირების მართვის უფელება აუქციონზე გასული წლის ოქტომბერში 15 წლით მოიპოვა. ამ სფეროში იგი რამდენიმე მილიონი ლარის ჩადებას გეგმავს. 

პარკირებიდან შემოსული თანხის 60% ქალაქის ბიუჯეტში გადაირიცხება, ხოლო დანარჩენი  - კომპანიას. „სიტი პარკი“ ებრაული მენეჯმენტის მქონე ქართული კომპანიაა.