ქვეყნის აღმასრულებელ ხელისუფლებაში განხორციელებული ცვლილებების შედეგად, საქართველოს საგარეო საქმეთა მინისტრის თანამდებობაზე დაინიშნა პირი, რომელიც დღემდე რუსეთის მოქალაქეა. ქვეყნის პირველი დიპლომატის რუსეთის მოქალაქეობის ფაქტი "მრეწველმა" ზურაბ ტყემალაძემ გააპროტესტა, რომელმაც განმარტა, რომ იმ ქვეყნის, რომელსაც მატყუარას უწოდებ, მოქალაქე არ უნდა გყავდეს აღმასრულებელ ხელისუფლებაში. გრიგოლ ვაშაძემ კი ჟურნალისტებთან საუბარში განმარტა, რომ ზურაბ ტყემალაძის არსებობის შესახებაც არ იცოდა. "ჯორჯიან თაიმსი" ზურაბ ტყემელაძეს დაუკავშირდა და გრიგოლ ვაშაძის ასეთი იუმორის საჯაროდ გამოხატვაზე ესაუბრა.
"ჯორჯიან თაიმსი": გრიგოლ ვაშაძემ ჟურნალისტებთან საუბარში აღნიშნა, რომ მან არ იცოდა თქვენი პიროვნების შესახებ.
ზურაბ ტყემალაძე, "მრეწველები": ჩემი აზრით, ქვეყნის საგარეო საქმეთა მინისტრმა უნდა იცოდეს წინა მოწვევის პარლამენტის დეპუტატების ვინაობა. მე ცოტა უფრო ირონიულად დავსვამ ამ საკითხს. ადამიანმა, რომელიც მიდის ანტიკრიზისული საბჭოს გამოძახებით ანტიკრიზისულ საბჭოზე კითხვების გასაცემად, ის თუ არ იცის, ანტიკრიზისულ საბჭოს რა ევალება, მათი წევრების ვინაობა მაინც უნდა იცოდეს. ეს არის პრეზიდენტის ბრძანებით ნორმატიული აქტით შექმნილი კომისია, რომლის წევრი მეც გახლავართ. აქ, ალბათ, ვაშაძეს სურდა ირონია გამოეხატა ჩემს მიმართ. ვითომ მე არ მიცნობდა და ა.შ.
როდესაც შეხვედრა იყო ვაშაძესთან და როცა ატყდა აჟიოტაჟი "ენგურჰესის" მმართველობასთან დაკავშირებით, მაშინ დავსვი საკითხი ერთი-ორი კოლეგის მიმართ. თუ შეიძლება, რომ ქვეყანაში არსებობდეს და აღმასრულებელ ხელისუფლებაში იყოს რუსეთის მოქალაქე, მაშინ რატომ არ შეიძლება "ენგურჰესის" მმართველი იყოს რუსეთის მოქალაქე?
როცა რუსეთთან ასეთი დამოკიდებულება გვაქვს, ორმაგი სტანდარტი არ შეიძლება. ბოლომდე უნდა ემსახურებოდეს საკუთარ ქვეყანას. თუ იძახიან, რომ რუსები მტრები არიან, მაშინ ქვეყნის პირველი პირი დიპლომატიურ ურთიერთობებში არ უნდა იყოს რუსეთის მოქალაქე. არც ერთი მინისტრი, არც მეორე. მეორეში ბენდუქიძეს ვგულისხმობ. ის მინისტრი არ არის, მაგრამ, მე მგონი, ბევრ მინისტრზე მეტი გავლენა აქვს.
_ როგორ ფიქრობთ, მან მართლა არ იცოდა თქვენი არსებობის შესახებ?
_ იცით, ნაკლებად მაინტერესებს, მიცნობს თუ არა გრიგოლ ვაშაძე. მან იცის თუ არ იცის ჩემი ვინაობის შესახებ, ეს არაფერს ნიშნავს. მე კითხვა დავსვი იმ კომისიის სხდომაზე და ამ კითხვაზე უნდა მივიღო პასუხი. მეტი არაფერი.
_ ხომ არ ფიქრობთ, რომ გრიგოლ ვაშაძისათვის რუსეთის მოქალაქეობა არის ერთგვარი იმუნიტეტი?
_ საერთოდ ორმაგი მოქალაქეობა გარკვეული იმუნიტეტი ყოველთვის არის. შეიძლება ძალიან საჭირო დროს მან ეს გამოიყენოს თავის, და არა ქვეყნის სასარგებლოდ.
ვიდრე ქვეყნის პირველი დიპლომატი ზურაბ ტყემალაძის კითხვებს გასცემს პასუხს, მოუწევს, წინა მოწვევების დეპუტატთა ვინაობებსა და მოკლე ბიოგრაფიებს გაეცნოს. პოლიტიკოსებს შორის ურთიერთობებსა და დიალოგში აუცილებელია, როდესაც კითხვას პასუხობ, იცოდე იმ ადამიანის შესახებ, ვინც შეკითხვა დაგისვა. წინააღმდეგ შემთხვევაში გაუმართლებელია და არც მაინცდამაინც დიპლომატიური საქციელია, როდესაც ქვეყნის შესახებ ანგარიშს აბარებ ადამიანს, რომლის სახელი და გვარი არ იცი, სტატუსი ხომ, მით უმეტეს!
