“ალიანსი საქართველოსთვის”  წევრების  დავით გამყრელიძის, დავით უსუფაშვილისა და ზურაბ აბაშიძის განცხადებით, ტელერადიოკომპანია “იმედი”, ფაქტობრივად, ხელისუფლებას გადაეცა.
“იმედის~ 90-პროცენტიანი წილის არაბულ კომპანია  “რაკ ჯორჯია ჰოლდინგისთვის”  გადაცემის ფაქტმა, მათი თქმით, უამრავ კითხვაზე გასცა პასუხი საზოგადოებას, რადგან საქართველოშიც და უცხოეთშიც ჯერ კიდევ მიმდინარეობს სასამართლო პროცესები პატარკაციშვილის ქონებასთან დაკავშირებით.

“ამ ვითარებაში ის ფაქტი, რომ უცხოური კომპანია სადავო ქონებას ყიდულობს, ადასტურებს, რომ ამაში ხელისუფლება მონაწილეობს”,-ითქვა დღევანდელ პრესკონფერენციაზე. 

დავით გამყრელიძის განცხადებით, ბიზნესის თვალსაზრისითაც სავსებით ალოგიკურია  არაბული კომპანიის გადაწყვეტილება “იმედის” შეძენის შესახებ, რადგან თვით სატელევიზიო ბიზნესი არის არამომგებიანი საქართველოში და ფინანსური კრიზისის დროს არანაირი  პრინციპით არ შეიძლება აიხსნას აშკარად წამგებიანი ბიზნესის შეძენა ნებისმიერი კომპანიის მიერ.

“რეალურად “იმედი” ხელში ჩაიგდო არა არაბულმა კომპანიამ, არამედ მიხეილ სააკაშვილმა და მისმა უახლოესმა გარემოცვამ _ ვანო მერაბიშვილის, ზურაბ ადეიშვილის, გიგი უგულავას და მისი დასაყრდენი სხვა ადამიანების სახით”, _ მიიჩნვეს დავით გამყრელიძე.

“ალიანსი საქართველოსთვის” მიჩნევს, რომ სააკაშვილის რეჟიმის შეცვლის შემდეგ ერთ-ერთი პირველი, რასაც საქართველოს ახალი ხელისუფლება გააკეთებს, იქნება სამართლიანობის აღდგენა და ტელეკომპანია “იმედის” დაბრუნება ბადრი პატარკაციშვილის მემკვიდრეებისთვის.

“ალიანსმა პრეზიდენტს მისცა 10-დღიანი ვადა, რომელიც 5 მარტს იწურება. თუმცა, იმის ნაცვლად, რომ ადეკვატური გადაწყვეტილება მიიღოს, პირიქით, სააკაშვილი უფრო უარეს ნაბიჯებს დგამს. ეს გამოიხატა კიდევ ერთი უკანონობის განხორციელებით, როცა სხვისი ქონება “იმედის~ სახით გადასცა არაბულ კომპანიას”,-აღნიშნა დავით გამყრელიძემ.