ჟურნალისტი ინგა გრიგოლია საზოგადოებრივი მაუწყებლის გენერალური დირექტორის მოადგილის თანამდებობიდან გადადგა.
როგორც „ინტერპრესნიუსს“ ინგა გრიგოლიამ განუცხადა, განცხადება გუშინ დაწერა. 

ჟურნალისტის თქმით, მიზეზი საზოგადოებრივი მაუწყებლის მიერ გავრცელებული განცხადება გახდა, რომელიც მასთან შეუთანხმებელი იყო და, რომელსაც  არ ეთანხმებოდა.

„მე არ ვიზიარებ იმ პოზიციას, რაც ამ განცხადებაში იყო. რადგან ვიყავი დირექტორის მოადგილე, მივიღე თანამდებობს დატოვების გადაწყვეტილება. გადავდექი, რადგან, როდესაც შენ ამხელა პოსტი გიჭირავს, გაქვს განსხვავებული პოზიცია და არ ეთანხმები ხელმძღვანელობის  განცხადებას, კეთილი უნდა ინებო და წახვიდე“,-აღნიშნა გრიგოლიამ.

ამასთან, მისივე თქმით, საზოგადოებრივ მაუწყებელზე გადაცემა „პოლიტიკური კვირა“ გაგრძელდება.

„გადაცემის წაყვანას ჩვეულებრივად გავაგრძელებ და დავრჩები რიგით ჟურნალისტად. როდესაც ვუთხარი ლევან ყუბანეიშვლს განცხადების დაწერის და გადადგომის შესახებ, მან  გამოითქვა სურვილი, გადაცემა ჩვეულებრივად გაგრძელებულიყო,  ჩემი თანამდებობიდან წასვლა არ შეეხებოდა გადაცემას. ვფიქრობ, გადაცემა უნდა გაგრძელდეს, რადგან აქამდე ამ გადაცემას პრობლემა არ ჰქონია და ეს არის თავისუფლი ტრიბუნა. როდესაც თვისუფალ სიტყვასთან დაკავშირები ამხელა პრობლემებია ქვეყანაში, პირდაპირ ეთერში გადაცემა, რომელიც რეალურად ასახავს ქვეყანაში განვითარებულ პროცესებს, უნდა გაგრძელდეს“,- განაცხადა ინგა გრიგოლიამ და აღნიშნა, რომ ვიდრე საზოგადოებრივ არხზე მიჰყავს გადაცემა, მისი სტუმარი ირაკლი ოქრუაშვილი ვერ იქნება.

„ეს ვერ მოხდება, ვიდრე  მაქვს გადაცემა პირველ არხზე. საზოგადოებრივმა მაუწყებელმა დააფიქსირა თავის პოზიცია,  რომ მსჯავრდებულების ჩართვა პირდაპირ ეთერში სტანდარტების დარღვევაა. ეს ნიშნავს, ვიდრე ხელშეკრულებით გადაცემა მექნება ამ არხზე, იმ პირებს, რომლებიც განცხადებაში იყო ჩამოთვლლი, მე ალბათ ვერ მოვიწვევ. ეს პირველი შემთხვევა იყო, მანამდე ზეწოლა არ მქონია. პირველივე პრობლემა ხმამაღლა გავახმაურე. ამ სკანდალმა დაადასტურა, რომ მე არავის ვუთანხმებ გადაცემის სტუმრებს. ირაკლი ოქრუაშვილს, უბრალოდ, ჯერ მოველაპარაკე და წინასწარ გავრცელდა, რომ უნდა მომხდარიყო ჩართვა. ტექნიკური საკითხების გამო ჩემი და ჩემი პროდიუსერის გადაწყვეტილება სხვა პირებისთვისაც უნდა მეთქვა და საერთაშორისო ჩართვის სიგნალი უნდა შემეკვეთა“,- აცხადებს ჟურნალისტი.

როგორც ცნობილია, საზოგადოებრივმა მაუწყებელმა გადაცემა ’’პოლიტიკურ კვირაში’’ ეკა ბესელიას  განცხადება ზეწოლად შეაფასა.
მაუწყებლის 10 მარტის განცხადების მიხედვით, გადაცემაში “პოლიტიკური კვირა” „მოძრაობა ერთიანი საქართველოსთვის“ ერთ-ერთი ლიდერი ცდილობდა, მიეღო გარანტია, რომ ინგა გრიგოლია ირაკლი ოქრუაშვილის ტელეხიდის მეშვეობით ინტერვიუს ჩამოართმევდა, ეკა ბესელია არ მალავდა, რომ ეთერშიც სწორედ ამ გარანტიის მისაღებად მივიდა.  პარალელურად, იგი მანიპულირებდა იმ ფაქტითაც, რომ „საზოგადოებრივი მაუწყებლის” ეთერში გრიგოლიას მუშაობა მისი დამსახურებაა.

„პოლიტიკოსი ქალბატონისგან ისმოდა ბრალდებები საზოგადოებრივი მაუწყებლის პოლიტიკურ მიკერძოებასთან დაკავშირებითაც, რისი კონკრეტული ფაქტიც ბესელიამ ვერ დაასახელა, საზოგადოებრივი მაუწყებელი საერთაშორისიო სტანდარტების დარღვევად მიიჩნევს იმ მსჯავრდებული პირების ეთერში გამოყვანას (მაგ. იგორ გიორგაძე, ირაკლი ოქრუაშვილი, ლევან მამალაძე, ემზარ კვიციანი და სხვები), რომლებიც საქართველოს სახელმწიფოს მიერ იძებნებიან”, - აღნიშნულია განცხადებაში.