აფხაზეთის ავტონომიური რესპუბლიკის უმაღლესი საბჭოს თავმჯდომარე  თემურ მჟავია  თანამდებობას ტოვებს. 

როგორც „ინტერპრესნიუსს“ თემურ მჟავიამ განუცხადა, გადაწყვეტილების მისაღებად კონკრეტული მოტივი ჰქონდა.

„ოფიციალურ განცხადებას გადადგომის შესახებ დღეს გავაკეთებ და დავასახელებ იმ  მოტივსაც, რომლის გამოც ასეთი გადაწყვეტილება მივიღე. თუმცა, კონსტიტუცია  მაძლევდა საშუალებას, ყოველგვარი მოტივის გარეშე დამეტოვებინა თანამდებობა“, - განმარტა მჟავიამ.

მისივე თქმით, აღნიშნულ თანამდებობაზე ყოფნის რეგლამენტირების პროცესი სრულად არ იყო შესრულებული.

„უმაღლესი საბჭოს შესაბამისი დადგენილება მთავრობის თავმჯდომარის მიერ უნდა ყოფილიყო ლეგალიზებული. თუმცა, აფხაზეთის ლეგიტიმური მთავრობის მაშინდელმა თავმჯდომარემ ირაკლი ალასანიამ ეს მიზანშეწონილად არ მიიჩნია და დღემდე ამ თანამდებობაზე მხოლოდ უმაღლესი საბჭოს დადგენილების საფუძველზე ვმუშაობდი“, - განმარტა მან.

თემურ მჟავია აფხაზეთის ავტონომიური რესპუბლიკის უმაღლესი საბჭოს თავმჯდომარის თანამდებობაზე 5 წლის განმავლობაში მუშაობს და მისი უფლება-მოსილების ვადა დღეს ამოიწურა.