ე.წ. სამხრეთ ოსეთში მასშტაბური აღდგენითი სამუშაოები აპრილის ბოლოდან დაიწყება. როგორც „ინტერფაქსი“ იუწყება, ამის შესახებ ცხინვალის მარიონეტული რეჟიმის ლიდერმა ედუარდ კოკოითიმ განაცხადა.

„აპრილის ბოლოსთვის ან მაისის დასაწყისისთვის მასშტაბური აღდგენითი სამუშაოები დაიწყება. სახსრები, რომლებიც რუსეთის ფედერაციამ ჩვენი რესპუბლიკის დასახმარებლად გამოყო, პირველ რიგში ამ მიზნისკენ იქნება მიმართული“, - აღნიშნა კოკოითიმ.

მისივე განცხადებით, უკვე მთავრდება კონსულტაციები რუსეთის ფედერაციის რეგიონების განვითარების სამინისტროსთან და აღდგენითი სამუშაოებისთვის მზადება სამი თვეში დასრულდება.

ცხინვალის რეგიონში აღდგენითი სამუშაოები თანხების არარსებობის გამო შეწყვეტილია. რუსეთის მხრიდან დაფინანსების შეწყვეტის მიზეზი  თანხების კონტროლის საკითხზე მოსკოვსა და ცხინვალს შორის წარმოქმნილი დაპირისპირება გახდა.