,,ჯორჯიან თაიმსზე და მის ოჯახზე განხორციელებული ზეწოლა ჩემთვის არის მიუღებელი,  სოლიდარობას გიცხადებთ და თუკი, საჭირო გახდება ჩვენ, ამ სოლიდარობას ხორცს შევასხამთ და დავდგებით ჯორჯიან თაიმსის გვერდით",- განაცხადა ჩვენთან საუბრისას ,,ალიანსი თავისუფლებისთვის” ერთ-ერთმა ლიდერმა, გია მაისაშვილმა.

_ ბატონო გია, რას ემსახურება თქვენი ალიანსი და აწარმოებთ თუ არა მოლაპარაკებებს სხვა ოპოზიციურ პარტიებთან?

_ ჩვენი, ამოცანაა ხელისუფლების შეცვლა და სამართალზე დაფუძნებული პოლიტიკური სისტემის შექმნა. ეს ალიანსი ამისთვის შეიქმნა და თუკი, სხვა ორგანიზაციებიც შემოგვიერთდებიან, რა თქმა უნდა, კარგი იქნება.

_ თქვენ ნინო შუბლაძის გადაცემა ,,პოზიციაში” გიორგი თარგამაძის მონაწილეობა გააპტოტესტეთ. თარგამაძესთან თანამშრომლობას გამორიცხავთ?

_ ჩვენ, გვინდა რომ ვითანამშრომლოთ ყველასთან, მაგრამ ეს თანამშრომლობა არ გვინდა, რომ ხელისუფლებისგან შემოგდებული ფანდი იყოს და ხრიკებზე იყოს აწყობილი.. ჩვენ, უნდა ვითანამშრომლოთ და დავილაპარაკოთ ყველასთან, მათ შორის ხელისუფლებასთანაც, მაგრამ მათთან ვისაუბრებთ მხოლოდ და მხოლოდ ერთ საკითხზე, ანუ ეს ხელისუფლება როგორ ჩამოშორდეს ქვეყანას, ისე, რომ არ მოხდეს დიდი ვნებათაღელვა... ფაქტობრივად, ავადმყოფი სისხლისგან იცლება, იმისთვის, რომ ავადმყოფი გადავარჩინოთ, უპირველეს ყოვლისა, სისხლი უნდა გავაჩეროთ ხომ?
   

 სისხლის შეჩერება კი ნიშნავს ამ ხელისუფლების ჩამოცილებას, ანუ ალტერნატივა ხელისუფლების წასვლას არა აქვს. ახლა, რომ შემოვიტანოთ რაგაც თემატიკა, იცით რა, მოდი, გადავიდეთ ამ ხელისუფლების გალამაზებაზე, იქნებდა, შემოგვეტანა საპარლამენტო მმართველობა, ამ საკითხზე საუბარი ყურადღების გადატანაა. საპარლამენტო მმართველობის შემოტანა სისტემის გაუმჯობესებას  არ ნიშნავს, მთავარია ხელისუფლების სამი შტოს დამოუკიდებლობა. აღმასრულებელი, საკანონმდებლო და სასამართლო უნდა იყოს დამოუკიდებელი და ერთმანეთის დამბალანსებელი. აი, ეს არის საფუძველი ჯანსაღი პოლიტიკური სისტემისა. ამ შემთხვევაში საპარლამენტო მმართველობაც მისაღებია და საპრეზიდენტოც. ოღონდ, ეს უკვე შემდგომი განსჯის საგანია. დღეს კი დღის წესრიგში დგას იმ ჭრილობის მოშუშება, რომელიც ჩვენს სახელმწიფოებრივ სხეულს სისხლისგან ცლის და ამ ჭრილობის მოშუშება მოხდება მხოლოდ ხელისუფლების წასვლით.

_ როგორ აპირებთ სააკაშვილის ხელისუფლების გასტუმრებას?

_ ჩვენ, გვინდა რომ შევქმნათ რაც შეიძლება ფართომასშტაბიანი ეროვნული ყრილობის მიერ არჩეული პოლიტიკურად ნეიტრალური ორგანო, რომელსაც ერქმევა ალტერნატიული მთავრობა. ეს ალტერნატიული მთავრობა, ფაქტობრივად, საქართველოში ორხელისუფლებიანობის ფსიქოლოგიურ განწყობას შექმნის და ჩვენ გვინდა, ასეთი ინიციატივა ჩვენგან მოდიოდეს.

_ როგორ განვითარდება მოვლენები 9აპრილს?

_ თუ ეს იდეა განვახორციელეთ და სხვა პოლიტიკური და საზოგადოებრივი ორგანიზაციები შემოგვიერთდნენ, მაშინ ხელისუფლება ვეღარ დაგვარბევს. ხოლო თუ არ შემოგვიერთდებიან, ჩვენ მაინც ვართ მონაწილენი 9 აპრილის მომზადებისა და ვეცდებით რომ პროტესტი მწვავედ გამოვხატოთ, მაგრამ ამავდროულად პროფესიონალურად, რომ ხელისუფლებამ ვერ გვაჯობოს.

_ რამდენად მოსალოდნელია აქციების კვალდაკვალ რუსეთის საფრთხის გააქტიურება?

_ რასაკვირველია, საფრთხე მოსალოდნელია. თურქეთის საფრთხეც მოსალოდნელია და ყველა სხვა  მეზობლის, როდესაც შენ ხარ დაქცევის პირას. ჩვენ, არ გვინდა კონფრონტაციული რაჟიმი არც რუსებთან და არც სხვა მეზობელთან. ჩვენ, გვინდა რომ ეს ქვეყანა ავაშენოთ.

_ როგორია აშშ-ს ადმინისტრაციის განწყობა საქართველოს ხელისუფლებისადმი?

_ ამერიკაში ბევრი რამ იცვლება, ახალი პრიორიტეტები და მსოფლიო წესრიგი ყალიბდება და ამ პრიორიტეტების საწინააღმდეგოა საქართველოში არსებული ხელისუფლება. აქედან გამომდინარე, მათი ინტერესიც არის ამ ხელისუფლების მოშორება. და თუ ეს ასე არ მოხდა, ჩვენი ქვეყანა საბოლოოდ მიწასთან გასწორდება.