ე.წ. სამხრეთ ოსეთის აღდგენის უწყებათაშორისმა კომისიამ მოსკოვში გამართულ მორიგ სხდომაზე სამუშაოების კომპლექსური გეგმა დაამტკიცა. 

ამის შესახებ რუსეთის ფედერაციის რეგიონული განვითარების სამინისტრის ოფიციალური ვებგვერდი იუწყება.

გეგმა 575 ობიექტის აღდგენასა და იმ ღონისძიებების გაგრძელებას ითვალისწინებს, რომლებიც 2008 წელს დაიწყო ან, შესაძლოა, 2009 წლის განმავლობაში განხორციელდეს.

კერძოდ, უნდა აღდგეს განათლების 36, კულტურის 3 და ჯანდაცვის 19 ობიექტი. ამასთან, უნდა განხორციელდეს, ასევე, ენერგომომარაგების, გაზმომარაგების, წყლით უზრუნველყოფის, კავშირისა და მასობრივი კომუნიკაციების, გზების მასშტაბური მშენებლობის პროექტები.

გეგმაში ცალკეა აღნიშნული აგროსამრეწველო კომპლექსის განვითარების ღონოსძიებები, რომელთა რეალიზებისთვის 100 მოლიონი რუბლია გათვალისწინებული.

კომისიამ დაამტკიცა ჩატარებული სამუშაოების მიღების წესიც. რეგიონული განვითარების სამინისტროს მონაცემებით, ამჟამად ჩატარებული სამუშაოების მოცულობა 3 მილიარდ რუბლს აღემატება. მიღებული დოკუმენტის მიხედვით, პირველი  აპრილიდან ცხინვალში სპეციალისტების შესაბამისი ჯგუფი გენერალური მოიჯარადეების დაფინანსების დაწყებისთვის დოკუმენტების მომზადებაზე იმუშავებს. ჯგუფში რუსეთის სამინისტროებისა და უწყებების წარმომადგენლები შევლენ და მათ რეგიონული განვითარების სამინისტროს წარმომადგენელი უხელმძღვანელებს.

 კომისიის სხდომაზე, რომელიც რეგიონული განვითარების მინისტრ ვიქტორ ბასაგრინს მიჰყავდა, კომისიის თავმჯდომარედ მინისტრის მოადგილე რომან პანოვი დანიშნეს. სხომაზე კომისიამ 2009 წლის მუშაობის გეგმაც დაამტკიცა.

 ამჟამად ცხინვალის რეგიონში აღდგენითი სამუშაოები შეჩერებულია. სამუშაოების შეჩერების მიზეზი მოსკოვიდან დაფინანსების შეწყვეტა გახდა, რაც თავის მხრივ ფინანსების გაკონტროლების საკითხზე მოსკოვსა და ცხინვალს შორის დაპირისპირებით არის განპირობებული.