|
პოლიტიკური მოძრაობის „ჩვენ თვითონ“ ლიდერი, საპარლამენტო უმცირესობის წევრი პაატა დავითაია ეროვნული კრების დაფუძნებას მიესალმება და აცხადებს, რომ შექმნილი კრიზისული ვითარებიდან ერთადერთი გამოსვალი ყველა სუბიექტს შორის დიალოგია.
„აუცილებელია დიალოგი ყველა სუბიექტს შორის შედგეს და შექმნილი ვითარება ამ გზით განიმუხტოს. ყველაფერი უნდა გაკეთდეს, რათა ხელისუფლება მხოლოდ და მხოლოდ მშვიდობიანი, კონსტიტუციური გზით შეიცვალოს და დაპირისპირება არავითარ შემთხვევაში არ დავუშვათ“, - განუცხადა „ინტერპრესნიუსს“ პაატა დავითაიამ.
მისი განცხადებით, ეროვნული კრების დაფუძნებაში მისმა მოძრაობამაც მიიღო მონაწილეობა, თავად კი კრების დაფუძნებას შეერთებულ შტატებში ვიზიტის გამო ვერ დაესწრო. პაატა დავითაია აშშ-ში სახელმწიფო დეპარტამენტის მიწვევით იმყოფება და სახელმწიფო დეპარტამენტის, კონგრესის, სენატისა და უშიშროების საბჭოს წარმომადგენლებთან შეხვედრებს აწარმოებს.
თბილისში დღეს ოპოზიციური პარტიების ნაწილმა ეროვნული კრება დააფუძნა. კრებამ მიიღო რეზოლუცია, რომელშიც 9 აპრილის მანიფესტაციისადმი მხადაჭერაა გამოხატული და ნათქვამია, რომ მოქმედი ხელისუფლება მშვიდობიანი გზით უნდა შეიცვალოს.
|
