,,მე გარწმუნებთ, ე.წ. ექსპერტი სოსო ცისკარიშვილი არაფრის მცოდნე არაა. ჯერ ერთი, არაფერი დაუწერია აზრიანი და მეორე, არც ნათელმხილველური ნიჭი აქვს, რომ განჭვრიტოს მომავალი. მე ვიცნობ კარგად მის წარსულს. სოსო ცისკარიშვილი იყო უშიშროების აგენტი. შეიძლება ვინმემ მითხრას, რომ მართალი არა ვარ ამ განცხადებისას, მაგრამ სანდო წყაროებიდან მაქვს ეს ინფორმაცია", _ აცხადებს ,,ჯორჯიან თაიმსთან" საუბრისას აკადემიკოსი ელიზბარ ჯაველიძე.

,,ჯორჯიან თაიმსი": ბატონო ელიზბარ, თქვენ ღიად დაუპირისპირდით ექსპერტ სოსო ცისკარიშვილს, რა არის ამის მიზეზი?

ელიზბარ ჯაველიძე: ამ ბოლო დროს მომრავლდნენ ექსპერტები, პოლიტოლოგები. ვისაც არ ეზარება, ყველა გამოდის განცხადებებით. ხელისუფლება თავის მიერ შობილ ექსპერტებს ანიჭებს ტიტულს. მე ექსპერტობა მაშინ მესმის, როცა კაცს პოლიტოლოგიაში დაწერილი აქვს ნაშრომები. მათი ნაშრომები ჯერ არ მინახავს, დასხდებიან და მსჯელობენ. რასაც მსჯელობენ, ის არის სისულელე. ყოველგვარი აზრისგან არის დაცლილი, ან საიდან გამოიჩეკნენ ეს ვითომ ექსპერტები?

_ მათი უმრავლესობა ოპოზიციურ აზრს ახმიანებს. ერთგვარად ხალხის აზრსაც გამოხატავს...

_ ჩაბრძანდით გლეხებთან და ნახავთ, რომ ისინი უფრო საღად და მართებულად აზროვნებენ, ვიდრე ე.წ. ექსპერტები და პოლიტოლოგები. მათში აშკარად ჩანს ხელისუფლების დაკვეთა. დაუჯერებელია, მაგრამ ამა თუ იმ ოპოზიციონერის ქებაც და ძაგებაც გათამაშებულია იმისთვის, რათა შექმნან საზოგადოებრივი აზრი.

როდესაც ეს ჩვენი ექსპერტები თუ ,,ყველა დროის წარჩინებული მოღვაწეები" შეამჩნევენ, რომ ნავი იძირება, მოჰყვებიან ხოლმე ნავის ძაგებას და ოპოზიციონერის მანტიას ირგებენ. მოტივად აქვთ არა პოლიტიკური სისტემის შეცვლა, არამედ სავარძლები. ისინი ხოტბას ასხამენ იმ ძალას, რომელიც, თუ ჩაანაცვლებს სააკაშვილის მმართველობას, უაღრესად გაანადგურებს ქვეყანას.

_ რომელ ძალაზე მიუთითებთ?

_ ალასანიაზე. 35 წლის ღლაპს, ირაკლი ალასანიას როგორ უნდა ვენდო, რომელსაც მეტად ბნელი წარსული აქვს და მალე წამოუტივტივდება ცოდვები. უჩივიან შვილმკვდარი დედები. რა გააკეთა გაერომ ჩვენს სასარგებლოდ, როცა ის ელჩი იყო? ალასანია არის "სააკაშვილი ნომერი 2". მათ შორის არის მხოლოდ სავარძლისმიერი დაპირისპირება.

ალასანიასავით დინჯია სოსო ცისკარიშვილი. გარეგნობა უწყობს ხელს, რომ ხალხი მოატყუოს მისმა "სტოიკურმა" სიდინჯემ. ტიპიური სათვალიანი აკადემიკოსი კაცია და მსჯელობს დინჯად. როგორც ჟურნალისტები და მსმენელები ამბობენ, სერიოზული კაცია. თავისი ქცევებით და წესით თავიდანვე ვატყობდი, რომ შებორკილი იყო და ვიღაცის მითითებებს ასრულებდა.

ცისკარიშვილმა სოროსთან გამონახა საერთო ენა. როდესაც მან ვენაში წასულ ადამიანებს რუსეთის აგენტები გვიწოდა, მეც საკადრისი პასუხი უნდა გავცე: ის არის სოროსის აგენტი, მისი ფულით აღზევებული. სოროსის ფულით შექმნა მან ლაბორატორია და მოიმაგრა ეკონომიკურად წელი. ეგ ის ცისკარიშვილია, რომელიც შევარდნაძის მორჩილი  იყო, მერე გამოაძევეს გუნდიდან და დაიწყო ახლა ოპოზიციონერობა.

მწვავე პოლიტიკური სიტუაციების დროს დუმდა ეს ბატონი, ახლა რომ ბურჯანაძეს უდგას გვერდით და მხარგრძელივით იქცევა. გულწრფელი და თავდადებული ოპოზიციონერის როლს თამაშობს. მე მას ვაფრთხილებ თქვენი საშუალებით, საერთოდ ნუ შეგვეხება იმათ, ვისაც სამშობლო და ერი უყვარს. თავისი ერისშვილობა დაამტკიცოს თავისი საქციელით, თორემ უარესებს ვიტყვი მასზე.

მე არავის ვუპირისპირდები პიროვნულად, ვუპირისპირდები საერთო ტენდენციას. ვინც სოროსის რძით არის ნაკვები და სოროსის ქურაში არის გამობრძმედილი, მე მისი ქართველობის არ მწამს. იმიტომ ვებრძოდით ჩვენ სოროსს, რომ აფინანსებდა ანტიქართულ საქმეს. სოროსმა დიდი ფული დახარჯა ცისკარიშვილსა და მისნაირებზე, რომ მიზნებისთვის მიეღწია. მთელი წელი მათ და ხელისუფლების სხვა წარმომადგენლებს ხელფასებს უხდიდა, რათა მისი სასურველი პოლიტიკა განეხორციელებინათ. დაანგრიეს და მოსპეს ეროვნული ცნობიერების კერები მათ, ვინც დღეს პოლიტიკას წარმართავენ.

_ რის საფუძველზე აცხადებთ, რომ ცისკარიშვილი აგენტია...

_ უნდა ჩატარდეს გამოძიება, უნდა მიიღონ ,,ლუსტრაციის კანონი", რომელიც გამსახურდიას დროს ჩავარდა. როდესაც ალასანია უშიშროების მინისტრის მოადგილე იყო, მას კავშირი ჰქონდა როგორც რუსეთის კაგებესთან, ისე ცრუ-სთან. უნდა ჩანდეს გამჭვირვალობა ყველა ადამიანისა. ზვიადის დროს ამ კანონის მოწინააღმდეგეთა არგუმენტი ის იყო, რომ ადამიანების გამოაშკარავება დააზარალებდა მათ შთამომავლობას. სინამდვილეში კი ეს აუცილებელია, რადგან ასეთ ადამიანებს უნდა ეკრძალებოდეთ პოლიტიკური მოღვაწეობა.

_ რამდენადაც ცნობილია, კაგებე-ს აგენტები ოფიციალურად არსად  იყვნენ დაფიქსირებულნი...

_ ვერ გეტყვით, კერძოდ, როგორ და სად მინახავს ამ აგენტების სია, მაგრამ ზვიად გამსახურდიას ჰქონდა ჩამონათვალი იმ აგენტებისა, რომელთა უმრავლესობაც იქ მეტსახელებით იყო შეყვანილი. ცისკარიშვილის აგენტობაც აქედან ვიცი. სხვა ბევრ ისეთ ადამიანზეც ვიცი, დღეს რომ ეროვნულ მოღვაწეებად არიან წარმოჩინებულნი. ცისკარიშვილი ერთ-ერთი მათგანია. მე მაქვს ინფორმაცია ბევრ სამღვდელო პირზეც, რომ ისინი უშიშროების აგენტები არიან. ამას აცხადებს რეზო ამაშუკელიც, რომელიც მოწმობს, რომ პატრიარქის გარშემო ასეთი 5-6 კაცია.

ჩატარდეს გამოძიება სახელმწიფო დონეზე და მე ვიტყვი მათ სახელებს. საგარეო საქმეთა მინისტრი რომ გვყავს რუსეთის მოქალაქე, ამაზე რატომ არავინ ლაპარაკობს? ეგ არ არის აგენტობა? ამ დროს რამდენს ლაყბობს რუსეთის წინააღმდეგ.

_ ბატონო ელიზბარ, რისი მოლოდინი გაქვთ 9 აპრილისათვის, ხომ არ შეშინდება საზოგადოება ბოლოდროინდელი მოვლენების გამო, გამოვა ქუჩაში?

_ აუცილებლად, 70 წლის ვარ და ამ ხნის მანძილზე ჯერ არ მინახავს ასეთი საპროტესტო მუხტი საზოგადოებაში. მე მეიმედება ეროვნული ფორუმი, ,,ლეიბორისტები" და ეკა ბესელია. მგონია, რომ გააქტიურდება ოქრუაშვილიც. მას ამის უფლება აქვს.

9 აპრილის მერე მოდით და გეტყვით, რა ფული ტრიალებდა სხვა ოპოზიციურ ძალებთან, რატომ მეპარება მათ ეროვნულობაში ეჭვი. 9 აპრილის მერე გეტყვით, როგორ და ვინ არის შეკრული ხელისუფლებასთან. არსებული ოპოზიციური ძალების დიდი ნაწილი სპექტაკლს დგამს და თამაშობენ. ზოგს პარლამენტში მოსვლა სურს მხოლოდ, ზოგთან კი დიდი ფული ტრიალებს.

მე თითოეულ კონკრეტულ პიროვნებაზე მაქვს ინფორმაცია. ხალხის ზურგსუკან საუბრობდნენ სააკაშვილთან და ამას თუ ისინი არ იტყვიან, სხვა იტყვის. ამიტომ არ ვენდობი ამ ძალებს, ცალი ,,კალოშით" რომ ჩამოვიდნენ და მილიონები იშოვეს. ისინი უნდა გამოვააშკარავოთ. ქართველმა ხალხმა პრინციპულობა უნდა გამოიჩინოს, თორემ სამუდამოდ დაიღუპავს თავს.