რუსეთი ურჩევს სხვა სახელმწიფოებს, საქართველოში დაგეგმილ ნატო-ს სამხედრო სწავლებაში მონაწილეობა არ მიიღონ.

როგორც „ინტერფაქსი“ იუწყება, ამის შესახებ რუსეთის საგარეო საქმეთა მინისტრმა სერგეი ლავროვმა დღეს მოსკოვში გამართულ პრესკონფერენციაზე განაცხადა.  მისივე თქმით, რუსეთი ამ სწავლებაში მონაწილეობას არ მიიღებს.

„ეს სწავლება ახლანდელ პირობებში საზიანოა. სააკაშვილმა დაანახა მთელ მსოფლიოს,  როგორ სარგებლობდა ნატო-ს მხრიდან წამახალისებელი ჟესტებით. ჩვენ დარწმუნებულნი ვართ და ამის შესახებ ყველა პარტნიორს ვეუბნებით, რომ ახალნდელი ქართული რეჟიმის წაქეზება სახიფათოა, რომელსაც პრობლემების მილიტარიზაციისა და ძალის გამოყენების გზით გადაჭრაზე უარი ჯერ კიდევ არ უთქვამს“, - განაცხადა ლავროვმა. 

მისივე თქმით, რუსეთი ამ სწავლებაში მონაწილეობას არ მიიღებს და მონაწილეობას არც სხვებს ურჩევს. ამასთან, ლავროვმა აღნიშნა, რომ რუსეთი საქართველოში დაგეგმილ სწავლებაზე დამკვირვებლების გაგზავნას არ აპირებს. 

ნატო-ს "პარტნიორობა მშვიდობისათვის" პროგრამის ფარგლებში მაისსა და ივნისში საქართველო "კოოპერატივ ლანსერ/კოოპერატივ ლონგბოუ"-ს უმასპინძლებს. სწავლება მიზნად ისახავს თანამშრომლობის გაღრმავებას კრიზისულ სიტუაციაზე რეაგირებისა და სამშვიდობო ოპერაციების დროს.