"თუ ხელისუფლება მრავალცოლიანობას დააკანონებს, დაუყოვნებლივ შევეკვრები მას" "პოლიტიკოსი ქალები საქართველოში მასობრივად უჭკუოები არიან, თამარ ჩხეიძის გარდა. შოუბიზნესში უფრო წარმატებული ქალები არიან. სალომე ზურაბიშვილი დახვეწილი, სიმპათიური, ჭკვიანი ქალია. ახლა რა გითხრათ, მაგრამ 25 წლის წინ მიმზიდველი ქალი იქნებოდა. ნინო ბურჯანაძე რომ ჭკვიანი ყოფილიყო, მოსკოვში პუტინთან ჩავიდოდა?", _ განაცხადა "ჯორჯიან თაიმსთან" საუბარში პოლიტიკოსმა, ირაკლი წერეთელმა, რომლის იუმორი საზოგადოებისათვის კარგად ნაცნობია. იგი ამჯერადაც განსხვავებული თემით წარვუდგინეთ მკითხველს.

ირაკლი წერეთელი: ძალიან კარგად ვგრძნობ თავს, თავისუფალი რომ ვარ. ვალდებულებები რომ არ მინდა, იმიტომ არ მომყავს ცოლი. მე მექალთანე არასდროს ვყოფილვარ, მაგრამ, როგორც ყველა ქართველი მამაკაცი, ყოველთვის ვიყავი ქალების მოტრფიალე. მიყვარს ის არსება, რომლის გარეშეც ზეციურმა ადამმა სამოთხეში მოიწყინა. სადაც სამოთხეში იწყენენ ქალების გარეშე, მე რატომ უნდა ვიცხოვრო მათ გარეშე? მექალთანე არა ვარ, უბრალოდ, მე ვარ სილამაზის მოტრფიალე კაცი.

_ თუ გამოგიყენებიათ თქვენი პოპულარობა ქალის მოსახიბლად?

_ რა თქმა უნდა, აბა, რად მინდოდა პოპულარობა? თქვენ გგონიათ, პოპულარობა მარტო საქართველოსთვის მინდა? რომც არ გამომეყენებინა, ჩემი სახელი ისედაც მოქმედებდა ყველა ქალზე. თანაც გამხდარი, სიმპათიური მამაკაცი ვიყავი. ახლა რომ გავსუქდი, ასეთი კი არ ვყოფილვარ ადრე. ახლანდელ ქალებს კი სპორტული აღნაგობის, ათლეტური მამაკაცები მოსწონთ.

_ რით უფრო იზიდავდით ქალებს: ინტელექტით თუ პოპულარული მამაკაცის ხელში ჩაგდების სურვილი ამოძრავებდათ?

_ არა მგონია, საქართველოში დღეს ქალი გარეგნობით მოხიბლო, რადგან ჩემზე უკეთესი მამაკაცებიც არსებობენ. ქალებში ჩემი წარმატება დამოკიდებული იყო ჩემს ხასიათზე და პოპულარობაზე, თორემ, ისეთი მამაკაცებიც ვიცი, არც გარეგნობით გამოირჩევიან, არც ინტელექტით და ქალების მთელი არმია დაჰყვებათ უკან. იმდენად ამაყი კაცი ვარ, რომ ქალის მოსახიბლად ყველანაირად არ დავიხარჯები. ქათინაურები და პირმოთნეობა ჩემთვის უცხოა. როცა ქალისგან სიცივეს ვგრძნობ, იმას ვერ შევეხვეწები.

_ როგორი მენტალიტეტი აქვს ქართველ ქალს?

_ ერთნაირი ქალები არ არსებობენ. მრავალფეროვანი ხასიათი აქვთ. მე მხოლოდ იმ შემთხვევაში ვიტყვი თავისუფლებაზე უარს, თუ ფინანსურად მოვძლიერდები. ქალს პირობები სჭირდება, რომ შენც გეხალისებოდეს მასთან ყოფნა. ახლა ძალიან დაკავებული ვარ "საოკუპაციო მოძრაობით" და ქალებზე ფიქრისთვის დრო აღარ მრჩება.

_ თქვენი დეოკუპაციის იდეა ხელისუფლებამაც გაიზიარა, კიდევ რაში თანამშრომლობთ?

_ თუ გაიზიარებს კიდევ ერთ იდეას და დაუშვებს მრავალცოლიანობას, დაუყოვნებლივ შევეკვრები ხელისუფლებას.

_ როგორც ვიცი, საქმიანი ქალები არ გიყვართ, რატომ?

_ თუ ქალთან საქმიანი ურთიერთობა მაქვს, ვისურვებდი, ნაკლებად შესახედავი იყოს, რომ არც საქმე გაფუჭდეს და არც მე. თუ თვალი გამექცა მის გარეგნობაზე, დაღუპულია საქმე. ლამაზი და ჭკვიანი ქალი პრაქტიკულად არ არსებობს. ჩემს მტერს ჭკვიანი ქალი! ქალი უნდა იყოს ნიჭიერი. მან თუ დაკარგა მიუსაფრობა და აუცილებელი სისუსტე, იგი მამაკაცად იქცევა. ასეთი ქალები არ მხიბლავს. ქალს, რომელსაც შეუძლია მამაკაცის გარეშე ფეხზე დადგეს, მას ქალი აღარ ჰქვია. სამწუხაროდ, ასეთები მომრავლდნენ საქართველოში, ხოლო კაცები მიუსაფრები გახდნენ.

_ ჩამოთვალეთ ჭკვიანი ქალები...

_ პოლიტიკოსი ქალები საქართველოში მასობრივად უჭკუოები არიან, თამარ ჩხეიძის გარდა. შოუბიზნესში უფრო წარმატებული ქალები არიან. სალომე ზურაბიშვილი დახვეწილი, სიმპათიური, ჭკვიანი ქალია. ახლა რა გითხრათ, მაგრამ 25 წლის წინ მიმზიდველი ქალი იქნებოდა. ფიქრია ჩიხრაძე და მანანა ნაჭყებია ჩემთვის ეროვნული მოღვაწეები არიან. მათ საქართველო სტკივათ და ორივეს მიმართ დიდი სიმპათია მაქვს. თინა ხიდაშელი `მამალი ქალია~. ერთხელ მისი და დარჩიაშვილის ინტერვიუ წავიკითხე. ეს მშვიდი კაცი ლამის გაბრდღვნა. როგორც ქალი, მისი ქმრისთვის იყოს. მას თავის ქმართან სინაზეც ექნება და სითბოც, საზოგადოებაში რომ არ წარმოაჩინოს, რა გასაკვირია. რაც შეეხება ნინო ბურჯანაძეს, ის რომ ჭკვიანი ყოფილიყო, მოსკოვში პუტინთან ჩავიდოდა? ასეთმა განათლებულმა, აკადემიურმა, გაწონასწორებულმა და კარგი ოჯახის შვილმა თავისი თავი ჩაიყენა ნოღაიდელის მდგომარეობაში.

_ მას თავისი არგუმენტები აქვს...

_ ასე ჰქონდა ჰიტლერსაც არგუმენტები, როცა საბჭოთა კავშირის დაპყრობა განიზრახა. ისეთმა განათლებულმა ქალმა, როგორიც ბურჯანაძეა, რა არის პოლიტიკური კეთილგონიერება, უნდა იცოდეს. მან ისიც უნდა იცოდეს, რომ საქართველოს ურთიერთობას რუსეთთან პერსპექტივა არა აქვს. საერთოდ მიმაჩნია, რომ, თუ ქალები იმსახურებენ, მხოლოდ მაშინ უნდა იყვნენ პოლიტიკაში. თუმცა არა ვარ მომხრე, რომ კაცმა ქალი მხოლოდ სამზარეულოსთვის გაწიროს. დღევანდელი ქართველი ქალები არიან ლამაზები, მაგრამ უწიგნურები. ამას არ სჯობია, ნაკლები შესახედაობის, მაგრამ ნაკითხები იყვნენ? ჩემთვის მთავარი ქალის წიგნიერებაა. სუფრაზე ქალი გამიცვნია, ველაპარაკები და მიიღებს ხოლმე უმეტყველო სახეს, ესაა საქმე? დღევანდელი ქალები არც მხატვრულ ლიტერატურაში ერკვევიან, არც მხატვრობაში, წაუგდიათ ენა და მეტი არაფერი იციან. დამაცადეთ თქვენ, თუ მოვედი ხელისუფლებაში, მოგივლით ყველას...

_ მე რაღას მერჩით?

_ რას და, ქალი რომ ხარ, იმას გერჩი. ოდესღაც სად ჰქონდა უფლება ქალს, ამდენი ელაპარაკა? დავაბრუნებ მაგ დროს. დამაცადეთ, დაგიმოკლოთ ენა და დაგიგრძელოთ კაბები!

_ რას იტყვით ქართველ ჟურნალისტებზე?

_ კარგი ჟურნალისტი იყო ეკა ბერიძე, სულ რომ სისულელე ელაპარაკა, მაინც მოუსმენდი. ჭკვიანურად მიჰყავდა გადაცემა. მას შემდეგ, რაც ის აღარ არის ტელეეკრანზე, ძალიან გაუჭირდა

ტელეჟურნალისტიკას. ეფექტური და ჭკვიანი იყო და არა გრიგოლიასავით "ბეტეერი". სიმპათიური ჟურნალისტები გვყავს საქართველოში, მაგრამ ყველა ხართ პროვოკატორები. ჩემზე რომ იყოს დამოკიდებული, ყველა ჟურნალისტს "ავაჭრელებდი"...