|
გ ა ნ ც ხ ა დ ე ბ ა
ბატონო მოსამართლევ! როგორც ვხედავთ, პროკურორები ზურაბ კუპატაძე და მანანა მოსულიშვილი აქ “დღევანდელი კვერცხის”, ანუ ახლა გადარჩენის პრინციპით მოქმედებენ და იმგვარ უკანონობას სჩადიან, თითქოს აწ და მარადის აღარავინ გაეცნობა ამ ბრალდების საქმის მასალებს. კერძოდ, მხედველობაში მაქვს ვითომცდა პატრულის ეკიპაჟის მიერ შედგენილი ოქმის სასამართლოში წარმოდგენა, რომლის “არსებობის” შესახებაც ჩვენ წინა სხდომაზე შევიტყვეთ.
ფაქტებიდან გამომდინარე, ნებისმიერ საღად მოაზროვნე ადამიანს უამრავი შეკითხვა გაუჩნდება: თუ ეს “ოქმი” მართლაც არსებობდა, რატომ არ მოხდა მასზე რეაგირება როგორც უშუალოდ შემთხვევის ადგილზე, ისე საქმის მსვლელობისას? რატომ არ არის მასზე ეკიპაჟის მესამე წევრის, ნათია ყორშიას ხელმოწერა? აქვე შეგახსენებთ, თქვენს შეკითხვაზე, შედგა თუ არა რაიმე დოკუმენტი მის მიერ ახლად გაჟღერებული ფაქტების შესახებ, ნათია ყორშიამ უპასუხა: “არ ვიცი, შეადგენდნენ ალბათ”. . . რატომ არაფერი იცოდა მან ამის შესახებ? . . . რატომ არ დაერთო ეს “ოქმი” თავის დროზე საქმის მასალებს? იგი ხომ ნომინალურად ასე მნიშვნელოვან ინფორმაციას შეიცავს . . . რატომ არაფერი უთხრეს წინასწარ გამოძიებას “ოქმის” შემდგენელმა პატრულებმა ან რატომ თქვეს გამოძიებისათვის მიცემულ ჩვენებებში, რომ მათთვის “საქმის ირგვლივ სხვა არაფერია ცნობილი?” რატომ მოხდა, რომ მაშინ, როდესაც ბრალდების “ოქროს მოწმე” 80 წლის, მხედველობადაქვეითებული, პირადი ინტერესის მქონე ქალბატონი გახლდათ, არც გამოძიება დაინტერესებულა ამ “ოქმით” და ვითომცდა “მოწმე” პატრულებით? ან რატომ არ შეატყობინა პატრულის სამსახურის შესაბამისმა თანამშრომელმა ამ “ოქმისა” და მისი ავტორების შესახებ გამოძიებას? თანაც, როდესაც ისინი, როგორც იტყვიან, შავ დღეში იმყოფებოდნენ მტკიცებულებათა არარსებობის გამო. და ბოლოს, რატომ არ სურდათ პროკურორებს ნათია ყორშიასა და შოთა კაპანაძის წინასწარი გამოძიებისათვის მიცემული ჩვენებების სასამართლოზე გამოქვეყნება? შეგახსენებთ, ბატონო მოსამართლევ, რომ პროკურორების მიერ მინიშნებები მიმიკითა და მიხვრა-მოხვრით ხსენებულ მოწმეთა დაკითხვის დროს, სწორედ მათი ადრეული ჩვენებების გამოქვეყნება-არგამოქვეყნებას უკავშირდებოდა.
ამ კითხვათა ჯაჭვს იქამდე მივყავართ, რასაც ორიოდე სიტყვით “ტოტალიტარული მანქანა” ჰქვია. ჩემთვის რაღათქმა უნდა, ცნობილია ამ უნიჭო სპექტაკლის მიზანი და არსი - პროკურატურა და შსს ხედავენ, რომ კრახი განიცადეს მიუხედავად უსაზღვრო საშუალებებისა და ძალაუფლებისა, და ყველაფერს კადრულობენ, რათა როგორმე რაიმე ბრალდება შეაკოწიწონ. დამსწრე საზოგადოებაცა და მეც, ბატონო მოსამართლევ, კარგად ვხედავდით როგორი ვედრებით შემოგციცინებდათ ზურაბ კუპატაძე თვალებში, როდესაც შეამდგომლობა დააყენა ხსენებული ყალბი ოქმის მიღების შესახებ და თან ვინმე გიორგი გეგეჭკორის, პატრულის ერთერთი ხელმძღვანელის ”ავტორიტეტს” იშველიებდა - აქაოდა, თვით გეგეჭკორის ხელმოწერააო ამ საბუთებში . . .
დაცვის მხარისათვის აბსოლუტურად ზუსტად გახლავთ ცნობილი, რომ ეს ”ოქმი” პროკურორმა ზურაბ კუპატაძემ წარმოდგენამდე ნახევარი საათით ადრე მიიღო უშუალოდ სასამართლოს შენობაში. ჩემს ადვოკატებს ვთხოვ, მიწეროს
2
გენპროკურორს, ვინმე მურთაზ ზოდელავას, განხორციელებული სამსახურებრივი სიყალბის შესახებ და მოვითხოვოთ პროკურორ ზურაბ კუპატაძის დაკითხვა, ასევე შესწავლილ იქნას დრო და ადრესატები მის მიერ განხორციელებული სატელეფონო ზარებისა; გამოკვლეულ იქნას პატრულის თანამშრომელთა ქმედებები და შესწავლილ იქნას ჩადენილი სამსახურეობრივი სიყალბე. თუმცა, ვინ, ვინ, და მე კარგად ვიცი, რომ მომხდართან დაკავშირებით არავითარი რეაგირება არ მოხდება, ისევე როგორც დავით ბაჯელიძის დატერორების ფაქტზე სასამართლოს შენობაში.
ბატონო მოსამართლევ! დიდმა ალბერტ აინშტაინმა თქვა: ”ქვეყნად მხოლოდ ორი რამ არის უსაზღვრო - სამყარო და სისულელე. თუმცა, სამყაროს თაობაზე ბოლომდე დარწმუნებული არა ვარ.” რაც დრო გადის, მით უფრო იზრდება პროკურატურისა და შსს თავხედობა და სისულელე. აღარაფერს აღარ ვითხოვ - არც სამართლიანობას, არც ობიექტურობას თუ მიუკერძოებლობას. ერთი რამ მინდა მხოლოდ: სასამართლომ თავად მაინც სცეს საკუთარ თავს პატივი.
გმადლობთ ყურადღებისათვის.
06.04.10წ.
პატივისცემით,
ცოტნე გამსახურდია
P.S.
ჩემს აზრს სავარაუდო განაჩენთან დაკავშირებით ჩემს საბოლოო სიტყვაში მოგახსენებთ, მაგრამ მსურს უკვე იცოდეს საზოგადოებამ და სასამართლომ, რომ მე და ჩემი დამცველები ნებისმიერ შემთხვევაში გავასაჩივრებთ ნებისმიერ განაჩენს გამამართლებლის გარდა ევროპულ სასამართლოში. ასევე აუცილებლად დავაყენებთ პროკურორ ზურაბ კუპატაძის, პოლიციის უფროს ნიკოლოზ გოგიაშვილის, გამომძიებლებისა და სხვა ყალბისმქნელთა სისხლის სამართლის პასუხისმგებლობის საკითხს.
სიტყვა წარმოთქმული სასამართლოზე 2010 წლის 6 აპრილს
|
Facebook
Twitter
Linked
Youtube
პოლიტიკა
