პოლონეთის პრეზიდენტ ლეხ კაჩინსკის თვითმფრინავის ავიაკატასტროფის მიზეზების შემსწავლელი ტექნიკური კომისიის დასკვნით, ტრაგედიაში დამნაშავე ავიალაინერის პილოტი იყო.
როგორც "კომერსანტს" გამოძიების ერთ-ერთმა მონაწილემ განუცხადა, ექსპერტებმა დაადგინეს, რომ პირობები, რომელშიც პილოტი თვითმფრინავის დასმას ცდილობდა ექსტრემალური იყო და "მიუხედავად იმისა, რომ
პილოტმა არკადიუშ პროტასიუკიმ ეს იცოდა, მაინც გაუმართლებელ რისკზე წავიდა".
ამასთან, უკვე გაშიფრულია პრეზიდენტის თვითმფრინავის შავი ყუთების ჩანაწერებიც, რის საფუძველზეც პოლონეთის მთავარი პროკურორი, პოლკოვნიკი კშისტოვ პარუვსკი აცხადებს, რომ "პილოტები იმას, რომ კატასტროფის თავიდან აცილება შეუძლებელი იყო, თვითმფრინავის ჩამოვარდნამდე რამდენიმე წუთით ადრე მიხვდნენ".
"ამის გამო, თვითმფრინავის ეკიპაჟის წევრების სიტყვები ლაინერის ჩამოვარდნამდე "დრამატული" იყო", - აცხადებს პოლკოვნიკი, თუმცა პილოტების საუბრის დეტალებს არ აკონკრეტებს.
ქვეყნის სამხედრო პროკურორის ვიგნერ ჟეპას განცხადებით კი, რომელიც თვითმფრინავის კატასტროფის გამოძიებაში ასევე მონაწილებს, ჩანაწერებში პილოტები სამ ენაზე: პოლონურად, რუსულად და ინგლისურად საუბრობენ.
მისივე განმარტებით, ამ დროისთვის მხოლოდ პილოტების ერთმანეთში საუბრის ჩანაწერია გაშიფრული და ის, ესაუბრებოდნენ თუ არა ისინი მგზავრებსაც, ჯერჯერობით უცნობია.
"ამის საბოლოოდ დადგენა უახლოეს პერიოდში, ჩანაწერების სრულად გაშიფვრისა და მათი ფრენის დროსთან სინქრონიზაციის შემდეგ გახდება შესაძლებელი", - აცხადებს ჟეპა.
შეგახსენებთ, რომ ეს თემა საინტერესო მას შემდეგ გახდა, რაც მედიაში გავრცელდა ინფორმაცია, თითქოს პრეზიდენტმა კაჩინსკიმ თავად მიიღო გადაწყვეტილება, თუ რომელ აეროდრომზე უნდა დაშვებულიყო თვითმფრინავი.
უნდა აღინიშნოს, რომ ექსპერტები არ ეთანხმებიან ავიაკატასტროფის მიზეზებთან დაკავშირებით პილოტის დაუდევრობის შესახებ ვერსიას და იმას, რომ მან ფორსაჟი ჩართო, რამაც ტრაგედია გამოიწვია და აცხადებენ, რომ ეს გამორიცხული იყო, რადგან ტუ-154-ს "ფორსაჟი" საერთოდ არ გააჩნია.
|
Facebook
Twitter
Linked
Youtube
პოლიტიკა
