სამიტზე 45 ქვეყნის პრეზიდენტი იყო ჩასული
და სააკაშვილი ძაღლად არცერთმა ჩააგდო

"სახელისუფლებო არხები ყველანაირად ცდილობენ, საზოგადოება შეცდომაში შეიყვანონ და ორწუთიანი ხელის ჩამორთმევა, როცა სააკაშვილი, მისთვის ჩვეული ფორმით, ლამის მიეჭრა ბარაკ ობამას, ორი ქვეყნის ლიდერებს შორის ქართულ-ამერიკულ ურთიერთობებზე სტრატეგიულ საუბრად წარმოგვიდგინონ. 

ის, რომ ამერიკის შეერთებული შტატების პრეზიდენტი თითქმის 2 წელია არჩეულია და მის სტრატეგიულ პარტნიორს, საქართველოს პრეზიდენტს ჯერ არ შეხვედრია და ამ სამიტზეც არ მოიცალა, ნათელი მესიჯი უნდა ყოფილიყო სააკაშვილისთვის. შედარებისთვის შემიძლია გითხრათ, რომ სომხეთის პრეზიდენტთან ბარაკ ობამას შეხვედრა საათნახევრით, თუ ორმოცი წუთით მეტხანს გაგრძელდა, ვიდრე პროტოკოლით იყო გათვალისწინებული. ბარაკ ობამა უკრაინის ახალ პრეზიდენტს, იანუკოვიჩსაც შეხვდა.

ნამდვილად არ მიხარია ამას რომ ვამბობ და გულწრფელად მიმაჩნია, რომ ეს კატასტროფაა ჩვენი ქვეყნისათვის. ამ სამიტზე 45 ქვეყნის პრეზიდენტი იყო ჩასული. სომხეთის, ყაზახეთის, უკრაინის და სხვა ქვეყნების პრეზიდენტებს შეხვედრა ჰქონდათ ამერიკის, რუსეთის და საფრანგეთის პრეზიდენტებთან, გერმანიის კანცლერთან, ერთმანეთსაც შეხვდნენ. ჩვენს პრეზიდენტს კი არავინ ხვდება ჟურნალისტების გარდა, _ განუცხადა "ჯორჯიან თაიმსს" ნინო ბურჯანაძემ, _ ან ის რას ნიშნავს, რომ ასეთ დაქცეულ და უმძიმეს ვითარებაში მყოფი ქვეყნის პრეზიდენტი 20 დღით მიდის უცხოეთში. დიპლომატიაში დიდი გამოცდილება მაქვს და ასეთი რამ არ გამიგია. პრეზიდენტები დასასვენებლადაც არ მიდიან ამდენი ხნით".

"ჯორჯიან თაიმსი": თავად ის ფაქტიც, რომ მსოფლიო ლიდერები ვერ ჩავიდნენ და საქართველოს პრეზიდენტმა რამდენიმე ქვეყნის საჰაერო სივრცე გამოიყენა, ზოგისთვის გამაღიზიანებელი აღმოჩნდა...

_ ეს ის შემთხვევაა, როცა არ გავამტყუნებ სააკაშვილს. ლეხ კაჩინსკის ნამდვილად ეკუთვნოდა საქართველოს პრეზიდენტისგან ასეთი განსაკუთრებული თავის შეწუხება. ამერიკის შეერთებული შტატების პრეზიდენტს, მიუხედავად მის მიერ გამოხატული სურვილისა, უბრალოდ არ მისცემდნენ უფლებას მისი უსაფრთხოების სამსახურები, რომ ასეთი შემოვლითი გზებით ჩასულიყო პოლონეთში. დახურული იყო საჰაერო სივრცე და ვერც საფრანგეთის პრეზიდენტი, ვერც გერმანიის კანცლერი, ფიზიკურად ამოდენა გზაზე ვერ წავიდოდნენ.

ლეხ კაჩინსკიმ თავისი თავი დაიზარალა ისეთი მხარდაჭერით, რაც სააკაშვილს და ჩვენს ქვეყანას გამოუცხადა. ძალიან კარგად მახსოვს ჩემი ბოლო შეხვედრა პოლონეთში პრეზიდენტთან და მასთან დაახლოებულ პირებთან. აქამდე არ მითქვამს, როგორი გულნატკენი იყო კაჩინსი იმის გამო, რაც სააკაშვილმა მას აქ, ახალგორთან მოუწყო. იმ პროვოკაციის შემდეგ კაჩინსკის დაცვა სამსახურიდან მოხსნეს. დაიწყო გამოძიება და პოლონეთში ძალიან ცუდ კონტექსტში მოიხსენიებდნენ თავად კაჩინსკის, რომელიც უპასუხისმგებლო და არასერიოზული სააკაშვილის მხრიდან ამ ინციდენტში ჩათრეული აღმოჩნდა. მე მართლა ვუერთდები იმ გულის ტკივილს, რაც ამ დღეებში გამოვხატეთ კაჩინსკისა და მისი მეუღლის, ასევე პოლონეთის ტრაგედიის გამო. ამ შემთხვევაში სააკაშვილი ფეხითაც რომ ჩასულიყო პოლონეთში, საქართველოდან და მისი პრეზიდენტისაგან კაჩინსკის პატივისცემა ნამდვილად ეკუთვნოდა.

_ რამდენიმე ქვეყნის საჰაერო სივრცის გამოყენება დიდ თანხებთან იქნებოდა დაკავშირებული?

_ კარგი რა, თუ ღმერთი გწამთ!.. სააკაშვილი 70 მილიონს იმაში იხდის, რეზიდენციის ფანჯრიდან ფასკუნჯის ფორმის განათებული, მაგრამ უფუნქციო ხიდი დაინახოს და ევროვიზიაზე, თვითონ რომ მოსწონს, ისეთ სიმღერას სარეზერვო ფონდიდან მილიონი ევროთი აფინანსებს. ან ბოდრუმში დასვენება რა დაჯდა?!. ახლა სააკაშვილის ადვოკატად ნუ გამომიყვანთ. მაგრამ ამ შემთხვევაში, ეს ხარჯი გამართლებულია.