The Georgian Times on the Web: Comprehensive news site, daily international, national and local news coverage , breaking news updates, sports, reviews.

"ქართულ ოცნებაში" ჯანმრთელობის დაცვისა და სოციალური უსაფრთხოების თემატური ჯგუფი შეიქმნა. თემატური ჯგუფის პრეზენტაციაზე ითქვა, რომ არსებული სოციალური სისტემა საერთაშორისო სტანდარტებიდან ამოვარდნილია და ის სასწრაფოდ შეცვლას საჭიროებს. რიგით მე-9 თემატურ ჯგუფს ოთარ ხუფენია ხელმძღვანელობს.

"ჯგუფს მიაჩნია, რომ ქვეყანაში შექმნილი სოციალური სისტემა იმდენად ამოვარდნილია საერთაშორისო გამოცდილებიდან და ყველანაირი კონტექსტიდან, რომ არ ექვემდებარება რეფორმირებასა და სრულყოფას, არამედ აუცილებელი და გარდაუვალი ხდება ამ სისტემის რეორიენტაცია, ანუ მიმართულების შეცვლა. მიმართულება, რომელიც დღეს არის, ავტორიტარიზმისა და ტოტალიტარიზმის სოციალურ საფუძვლებს აჩენს, რეორიენტაცია კი თავისუფალი და ღირსებით სავსე საზოგადოების მშენებლობას გულისხმობს", - განაცხადა ოთარ ხუფენიამ.

"პენსია, დეკრეტული შვებულება, დროებითი შრომისუუნარობის, უმუშევრობის დახმარება და ა.შ. ხელისუფლების "წყალობად" არის მიჩნეული, ხოლო ე.წ. "სიღარიბის ზღვრის" მექანიზმი კოლექტიური მათხოვრობის სისტემად გადაიქცა. მთელი პასუხისმგებლობა დელეგირებულია კერძო სექტორზე, რის შედეგადაც როგორც სამედიცინო პერსონალი, ისე პაციენტი დაუცველი დარჩა. იმის გამო, რომ არ არსებობს ბენეფიციართა და სადაზღვევო კომპანიების ურთიერთობის რეგულირების სამართლებრივი საფუძვლები, ჯანდაცვის სამინისტრო სადაზღვევო ბროკერადაა ქცეული. გარდა ამისა, არარეგულარული სადაზღვევო ბაზრის გამო შექმნილია ხელოვნული მონოპოლია და მედიკამენტი, ჰოსპიტალი, სადაზღვევო საქმიანობა ერთი ეკონომიკური სუბიექტის ხელში აღმოჩნდა. ამასთან, მოსახლეობის სოციალური დაცვის თანამედროვე სისტემის ნაცვლად, ჩამოყალიბებულია ხელისუფლების მიერ გაღატაკებული მოსახლეობის მოსყიდვის და ძალაუფლების შენარჩუნების ფეოდალური მექანიზმები", - განაცხადა ოთარ ხუფენიამ.

"ეს უნდა მოხდეს პოლიტიკური და საზოგადოებრივი კონსენსუსის საფუძველზე. ამისთვის კი თბილისსა და რეგიონებში, მოსახლეობის სხვადასხვა სოციალურ ჯგუფებთან, ექსპერტებსა და სპეციალისტებთან სისტემატური შეხვედრები გაიმართება", - განმარტა მან.