[Presage.tv]

,,ქართული ოცნების“ ლიდერის, ბიძინა ივანიშვილისთვის საქართველოს მოქალაქეობის შესახებ, იუსტიციის სამინისტროს დასკვნა  ევროპული ინტეგრაციის კვლევის ცენტრის პრეზიდენტის, ვასილ ჭყოიძისთვის ნათელია.

ჭყოიძის განცხადებით, ,,ქართული ოცნების“ ლიდერს გამოსავალი პრეზიდენტისთვის საქართველოს მოქალაქეობის მინიჭების თხოვნა  და საფრანგეთის მოქალაქეობიდან გამოსვლა დარჩა.

,,ამას არ სჭირდებოდა ძალიან დიდი იურისტობა, ელემენტარულად დაინტერესებულ პირებს საქართველოს კონსტიტუცია და საქართველოს მოქალაქეობის შესახებ ორგანული კანონი უნდა წაეკითხათ.  საქართველოს კონსტიტუციით ორმაგი მოქალაქეობა დაუშვებელია და  ორგანულ კანონშიც იგივე მეორდება“,-განაცხადა ჭყოიძემ.

მისივე თქმით, ბიძინა ივანიშვილისთვის  ეს გამონაკლისი  საქართველოს პრეზიდენტმა  2004 წელს განახორციელა, შემდგომ მან  საფრანგეთის მოქალაქეობა მიიღო, რის საფუძველზეც საქართველოს მოქალქეობა  ხელმეორედ დაკარგა.

ვასილ ჭყოიძე,  ,,ქართული ოცნების“ ლიდერის იურისტებს, სტრატეგიას უწუნებს და აცხადებს, რომ  მათ ბოლომდე ან არ გაარკვიეს ან თემა იყო პოლიტიზირებული და უნდოდათ ივანიშვილისთვის ესიამოვნებინათ.

 ,,იმის თქმა, რომ თქვენ,  უნდა სთხოვოთ პრეზიდენტს, მაშინ, როდესაც მისი დაქირავებული ადამიანები პრეზიდენტის სურათს ფეხქვეშ უფენენ და  ფეხის დარტყმას აიძულებენ... ზნეობრივად ივანიშვილი ცოტა უხერხულ მდგომარეობაში ჩააგდეს, რადგან  ახლა ერთადერთი გზაა პრეზიდენტს  თხოვნით მიმართოს“,- განაცხადა ჭყოიძემ.

შეგახსენებთ, იუსტიციის სამინისტრომ ,,ქართული ოცნების“ ლიდერისთვის, ბიძინა ივანიშვილისთვის საქართველოს მოქალაქეობის ნატურალიზაციით მიღება არ დააკმაყოფილა.