საზოგადოებრივი მაუწყებლის ეთერში ეკა კვესიტაძის საავტორო გადაცემაში "აქცენტები" შრომის, ჯანმრთელობის და  სოციალური დაცვის მინისტრი ბატონი ზურაბ ჭიაბერაშვილი საუბრობდა სოციალურად დაუცველი ოჯახების დახმარების სისტემაში ცვლილებების აუცილებლობაზე.

"ახალი  მემარჯვენეები" ვთვლით, რომ  ამჯერადაც  ხელისუფლების წარმომადგენლები შემოიფარგლებიან ზოგადი განცხადებებით, მაშინ როდესაც   სოციალურად დაუცველი ოჯახების დახმარების სისტემა ქვეყანაში მართლაც ძალზე  არასამართლიანი, ბუნდოვანი  და არაობიექტურია და საჭიროა ბევრად უფრო  რადიკალური ცვლილებების განხორციელება.

პირველ რიგში,  ბატონი ჭიაბერაშვილი არ საუბრობს, რომ აუცილებელია მოხდეს მთელი ქვეყნის მასშტაბით  ოჯახების სოციალურ -ეკონომიკური  მდგომარეობის შეფასების  სარეიტინგო ქულების უნიფიცირება.

 უსამართლო და გაუმართლებელია, როცა  თბილისსა და აჭარაში ადგილობრივი ხელისუფლებების გადაწყვეტილებით ეს ქულები ბევრად მაღალია, ვიდრე დანარჩენ საქართველოში - თბილისში  - 100 000, აჭარაში -200 000, დანარჩენ საქართველოში -70 000.  რა დააშავეს სხვა ადგილობრივმა თვითმმართველობებმა, რომლებიც  არსებული  საბიუჯეტო  კანონმდებლობის წყალობით   საკუთარ ბიუჯეტებში თანხა  არ რჩებათ ანალოგიური  შეღავათები გაუკეთონ თავიანთ დაუცველ მოსახლეობას?  (დღევანდელი ხელისუფლების ერთერთი პირველი ნაბიჯი  სწორედ  საბიუჯეტო  კანონმდებლობაში განხორციელებული ცვლილებები იყო, რომლის   შედეგად მოგების და საშემოსავლო     გადასახადი    მთლიანად  ცენტრალურ ბიუჯეტში  მიდის და ადგილზე არ რჩება). 

საჭიროა მთავრობამ მიიღოს გადაწყვეტილება და მთელი საქართველოს მასშტაბით სარეიტინგო ქულების ზედა ზღვარმა  არსებული 70 000-დან აიწიოს 100 000-მდე როგორც ეს დედაქალაქშია. მითუმეტეს, სტატისტიკურად დადგენილია,  რომ სოციალური დახმარების პროგრამის მიზნობრივი ჯგუფი 66%- ით  სწორედ სოფლად მცხოვრები  ღარიბი მოსახლეობაა.

ასევე, როგორც ჩანს,  ხელისუფლება კვლავ აპირებს ბუნდოვანი დატოვოს  კოეფიციენტები ოჯახების სოციალურ-ეკონომიკური შეფასების მეთოდიკაში.  მთავრობის შესაბამისი  დადგენილებით  2010 წელს  თითქოს გადაწყდა, რომ  გარკვეული  ტიპის საყოფაცხოვრებო  ტექნიკა ოჯახების სიმდიდრის მაჩვენებელი აღარ იქნებოდა, მაგრამ    ბუნდოვანი ჩანაწერის გამო სწორედ საყოფაცხოვრებო ტექნიკა და პირველ რიგში ტელევიზორის ქონა     ხშირ შემთხვევაში ხდებოდა  ოჯახის   სოციალური დახმარების სიიდან ამოღების საბაბი.  დღესაც ბატონი ჭიაბერაშვილი  საუბრობს ტოსტერზე და მტვერსასრუტზე, თუმცა  მან ძალიან კარგად იცის, რომ ეს ნივთები სოფლად თითქმის არავის აქვს და არც  შეუქმნია პრობლემა, მაშინ როცა ხშირად  საბჭოთა წარმოების ტელევიზორების გამოც კი ოჯახებს დახმარებას არ აძლევდნენ.

მოვითხოვთ საქართველოს მთავრობის დადგენილებაში "სოციალურად დაუცველი ოჯახების სოციალურ-ეკონომიკური მდგომარეობის შეფასების მეთოდოლოგიის დამტკიცების შესახებ"  არსებული ბუნდოვანი ფორმულირებების ნაცვლად   შეიტანილ იქნას  კოეფიციენტების ზუსტი ჩამონათვალი  და  მასმედიის საშუალებებით გამოაქვეყნდეს   მკაფიო   მეთოდიკა და კრიტერიუმები, რითაც მოხდება ოჯახების მდგომარეობის შეფასება.

ასევე,  მოვითხოვთ  შრომის, ჯანმრთელობისა და სოცალური დაცვის სამინისტრომ  შეასრულოს "სოციალური დახმარების  შესახებ"  საქართველოს კანონის მე - 17 მუხლი და საჯარო გახადოს სოციალური დახმარების დანიშვნის შესახებ მიღებული გადაწყვეტილებები.  თითოეული გადაწყვეტილება თავისი სარეიტინგო ქულებით უნდა ქვეყნდებოდეს სოციალური დახმარების სააგენტოს ვებ- გვერდზე და მასზე ხელი უნდა მიუწვდებოდეს  ყველა დაინტერესებულ პირს. დღეს ამ პროცესის გაუმჭვირვალობა ბევრ ეჭვს ბადებს, რომ დახმარებები გაიცემა არა სამართლიანად და  ობიექტურად,  ოჯახის  მდგომარეობის გათვალისწინებით, არამედ   ნაციონალური მოძრაობის მიერ  გამოიყენება არჩევნებში მხარდაჭერის  მოსაპოვებლად.

მოვუწოდებთ   შრომის,  ჯანმრთელობისა და სოციალური დაცვის  მინისტრს  ბატონ ზურაბ ჭიაბერაშვილს  ნუ შემოიფარგლება მხოლოდ განცხადებებით   სოციალურად დაუცველთა დახმარების   სისტემაში ცვლილებების  შეტანის აუცილებლობის შესახებ  და რეალურად განახორციელოს  ბევრად  უფრო ღრმა და საფუძვლიანი  ცვლილებები, რომელიც ამ სფეროში მართლაც  უზრუნველყოფს წესრიგის დამყარებას.