საქართველოს კულტურისა და ძეგლთა დაცვის მინისტრმა,  ნიკა რურუამ სამთავრობო საათზე განაცხადა, რომ  საქართველოსა და თურქეთს შორის ოშკის აღდგენის შესახებ სატელეფონო მოლაპარაკებების განსაჯაროვება,  ძლივს საქმიან ეტაპზე გადასულ ურთიერთობას მხოლოდ ჩაშლის.

რურუას განცხადებითვე, როცა ეს პროექტი დასრულებული სახით იარსებებს, მას პატრიარქი, პარლამენტი და მთელი ქართული საზოგადოება გაეცნობა.

„ჯერჯერობით ეს პროექტი არ არსებობს, არის მხოლოდ საუბარი საქართველოს კულტურისა და თურქეთის კულტურისა და ტურიზმის სამინისტროებს შორის. დავაზუსტებ, რომ ამგვარი მოლაპარაკებები, რომლებიც არამხოლოდ ოშკს, არამედ ტაო-კლერჯეთის ტერიტორიაზე სხვა ძეგლებსაც ეხებოდა, წლების განმავლობაში არანაირი შედეგით არ დამთავრებულა, რასაც ჩვენი ქვეყნის ძალიან მნიშვნელოვანი კულტურული მემკვიდრეობის ძეგლების განადგურება მოჰყვა", - განაცხადა რურუამ.

მინისტრმა ასევე  გასულ წლებში ოშკის მდგომარეობისა და ზოგადად, ქართული სახელმწიფოსთვის მის მნიშვნელობაზე ისაუბრა.

 "ოშკის ტაძარი ქართული ქრისტიანული ხუროთმოძღვრების ქრესტომათიული საეტაპო ნიმუშია. განუსაზღვრელია ამ შესანიშნავი ტაძრის მხატვრულ-ისტორიული ღირებულება. მნიშვენლოვანი დაზიანებისა და დანაკარგების მიუხედავად, ოშკის მხატვრულ-არქიტექტურული სახე დღემდე სრულიად მოღწეულია. ძალზე მნიშვნელოვანია ის ფაქტი, რომ არსებობს თანადროული, ანუ მაშინდელი გუმბათი ოშკზე კრამიტით მოჭიქული და ისიც აღსანიშნავია, რომ მე-10 საუკუნის სხვა არც ერთ ქართულ ძეგლზე პირველადი გუმბათი აღარ არის შემორჩენილი. მე-16 საუკუნიდან, ანუ მას შემდეგ რაც ეს ტაძარი თურქეთის საზღვრებში მოექცა, შენობის სამხრეთ ნაწილში მუსულმანური სამლოცველო მოეწყო, რამაც კედლის მხატვრობა მთლიანად დაფარა. წინა საუკუნის 1990-იან წლებში ეს სამლოცველო გაუქმდა, შემდგომ კი ნაგებობა სასოფლო-სამეურნეო საწყობად გამოიყენებოდა, რაც სრულიად შეუფერებელი იყო, მაგრამ თურქეთის მთავრობის მეგობრული ჟესტით, ეს საწყობიც გაუქმდა და დღეისთვის ტაძარი სრულიად გათავისუფლებულია და სარესტავრაციო სამუშაოების დასაწყებად მზადაა. ოშკის კედლებზე დაცულია არაერთი წარწერა და მხატვრობა, რომელიც შენობის დანგრევის ან არასწორი რესტავრაციის შემთხვევაში აღდგენას აღარ დაექვემდებარება. 2009-2010 წლებში ოშკზე სამეცნიერო-კვლევითი ექსპედიცია მოეწყო, შედეგად ტაძრის სრული ციფრული ანაზომი მივიღეთ. მთელი კომპლექსი დაუყოვნებლივ რესტავრაციას საჭიროებს იმისათვის, რომ ის ფიზიკურად არ განადგურდეს", - განაცხადა რურუამ.