17 აპრილს თბილისის მერიის შენობის წინ გამართულ საპროტესტო აქციაში ათასზე მეტმა ადამიანმა მიიღო მონაწილეობა, რომლებიც საკუთარ უკმაყოფილებას გამოხატავდნენ საზოგადოებრივი ტრანსპორტით სარგებლობის ტარიფების გაზრდაზე და პენსიონერთათვის შეღავათების ჩამორთმევაზე.

აქციის მონაწილენი ოპოზიციური პარტიების ლიდერთა თხოვნით დაიშალნენ. აქციის დასრულებისთანავე ოპოზიციური პარტიების ლიდერთა შეხვედრა გაიმართა, სადაც გადაწყდა საორგნიზაციო კომიტეტის შექმნა და აქციის მონაწილეთა მოთხოვნების დაკონკრეტება.

როგორც ოპოზიციური პარტია ”ქართული დასის” ლიდერმა ჯონდი ბაღათურიამ ჟურნალისტებს განუცხადა, ”დღევანდელი აქციით მოსახლეობამ საფუძველი ჩაუყარა საპროტესტო მოძრაობას, რომელშიც ქვეყნის ყველა მცხოვრები გაერთიანდება”.

მუნიციპალიტეტის შენობასთან სამი აქცია გაერთიანდა, რომლებიც სხვადასხვა პოლიტიკური ძალების მიერ იყო ორგანიზებული.

ოპოზიციური პარტია "ქართული დასის" წარმომადგენლებმა საკუთარ მომხრეებს მოუწოდეს მერიასთან თავშეყრა, რათა გაეპროტესტებინათ გაზის და საზოგადოებრივი ტრანსპორტით სარგებლობის გაძვირება. ასეთივე მოთხოვნებით გამოვიდა პოლიტმოძრაობა "ჩვენ თვითონ", ხოლო პოლიტმოძრაობა "თავისუფლების" ახალგაზრდული ორგანიზაცია თბილისის ისტორიული ნაწილში საკუთრებაზე გადასახადის შემოღებას აპროტესტებდა.

აქციას შეუერთდნენ პენსიონერები და ძალოვანი სტრუქტურების ვეტერანები და ასევე წვრილი მეწარმეები.

აქციის მონაწილეთა და საპატრულო პოლიციას შორის ვითარება დაიძაბა, ვინაიდან მომიტინგეებმა ქუჩის სავალი ნაწილი დაიკავეს და ტრანსპორტის მოძრაობას ხელს უშლიდნენ.

მოძრაობა "თავისუფლების" მომხრეთა აქცია-მსვლელობა, რომელიც ლესელიძის ქუჩიდან დაიწყო, შეუფერხებლად გაიმართა. აქციას ადგილობრივი მოსახლეობა შეუერთდა. აქციის მონაწილეებმა მოძრაობა გადაკეტეს ქუჩაზე და თბილისის მერიის შენობამდე მივიდნენ. მათ ცოცხალი ჯაჭვი შექმნეს. "ის რაც დღეს ხდება სავსებით მიუღებელია. როცა პენსიონერს 50 კვადრატულ მეტრზე 70 ლარს დაუწესებენ, ის ამ თანხას ვერ გადაიხდის და ფაქტობრივად ქუჩაში რჩება", - აცხადებენ მსვლელობის მონაწილენი.