მიუნხენში მიხეილ სააკაშვილი ამერიკის ვიცე-პრეზიდენტს შეხვდა. საუბარი დახურულ კარს მიღმა ერთ საათს გაგრძელდა. განიხილებოდა ქართულ-ამერიკული ქარტია და ამ დოკუმენტის ფარგლებში სამომავლო სამუშაო გეგმები, საქართველოს ჩრდილო-ატლანტიკურ ალიანსში ინტეგრირების ვადები და ევროპასთან ურთიერთობის გაღრმავება.

მიუნხენში მიმდინარე კონფერენციისას საქართველოს ნატოში გაწევრიანების საკითხებზე აქცენტები, ქართული დელეგაციის შეფასებით, სიგნალია რუსეთისთვის რომ მესამე ქვეყანა ამ საკითხის გადაწყვეტაზე გავლენას ვერ მოახდენს. მიხეილ სააკაშვილის თქმით, მან ბაიდენისგან მტკიცე გარანტიები მიიღო, რომ ამერიკა გააგრძელებს ფინანსურ დახმარებას საქართველოსთვის, რაც ძალიან მნიშვნელოვანია მსოფლიო კრიზისის ფონზე. ასევე, ყველა სახის მოლაპარაკებებში, რომელიც რუსეთთან ექნება ამერიკას, საქართველო იქნება ძალიან მნიშვნელოვანი საკითხი.

`დღეს დადასტურდა, რომ ჩვენ გვაქვს აშშ-ს ახალი ადმინისტრაციის ურყევი, სერიოზული, ძალიან დეტალური მხარდაჭერა. და ეს იყო მთავარი გზავნილი, რომელიც მე მიმაქვს საქართველოში და ჩვენ ვუგზავნით დანარჩენ მსოფლიოსა და ჩვენს სამეზობლოს,` - განაცხადა სააკაშვილმა. 

ჯო ბაიდენმა საქართველოსა და ქართველების მიმართ კეთილგანწყობა გამოხატა და განაცხადა, რომ აშშ მხარს უჭერს საქართველოს დამოუკიდებლობას. აშშ-ის ვიცე-პრემიერმა კონფერენციაზე რამდენჯერმე აღნიშნა, რომ აშშ არასოდეს აღიარებს აფხაზეთისა და სამხრეთ ოსეთის დამოუკიდებლობას. ჯო ბაიდენი რუსეთის ვიცე-პრემიერ სერგეი ივანოვსაც შეხვდა.

საქართველოს პრეზიდენტმა კონფერენციაზე ევროპელი ლიდერების მხარდაჭერაც შეაფასა. მისი აზრით, ამერიკისგან განსხვავებით, ევროპაში არის აზრთა სხვადასხვაობა. თუმცა მთლიანობაში ევროკავშირის და ნატოს პოზიცია არის ერთმნიშვნელოვანი - არასდროს არ მოხდება კომპრომისი ტერიტორიულ მთლიანობასთან დაკავშირებით; საქართველოს არავინ არ დააბრუნებს ძველი გავლენის სფეროში, არავინ დაუშვებს საბჭოთა კავშირის აღდგენას და ვინც ამას განიზრახავს, მცდელობა ძალიან ძვირი დაუჯდება.

მიხეილ სააკაშვილის ჯო ბაიდენთან შეხვედრით დასრულდა საქართველოს პრეზიდენტის ვიზიტი გერმანიაში. დღეს მიუნხენის კონფერენციაც სრულდება.