ორგანიზაცია “ნაში”-ს წევრები ამ დროისთვის ისევ ქართულ-ოსური კონფლიქტის ზონაში იმყოფებიან.

მოსკოვიდან ხუთი მსუბუქი მანქანით ჩამოსული ახალგაზრდები გვიან ღამემდე იმყოფებოდნენ ერგნეთის მიმდებარე ტერიტორიაზე და მოგვიანებით კარვების გაშლა დაიწყეს.

ერგნეთთან ხუთი საველე კარავია გაშლილი, თუმცა “ნაში”-ს წევრებს ღამე   კარვებში არ გაუთევიათ და ცხინვალში სასტუმროში იმყოფებოდნენ. 

ცოტა ხნის წინ  ისინი ერგენთის მიმდებარე ტერიტორიაზე, ანუ იმ ადგილზე, სადაც აგვისტოს ომამდე ქართველი სამართალდამცველების საგუშაგო იყო განთავსებული, კვლავ გამოჩნდენენ.

ვრცელდება ინფორმაცია, რომ, დაახლოებით, ერთ საათში რუსი ახალგაზრდები კვლავ შეეცდებიან,  გადმოკვეთონ ქართული მხარის კონტორილირებადი ტერიტორია და საქართველოს ხელისუფლების საწინააღმდეგო აქცია გამართონ.

შიდა ქართლის სამხარეო პოლიციის უფროსი ვლადიმერ ჯუღელი “ინტერპრესნიუსთან” საუბრისას აცხადებს, რომ “ნაში”-ს წევრებს, ბუნებრივია, არანაირი საშულება არ მიეცემათ, რომ ქართული მხარის კონტროლირებადი ტერიტორია გამოიარონ და  აქციების გამართვა დაიწყონ.

როგორც ცნობილია, ორგანიზაციის ერთ-ერთი წევრი გუშინ ქართველმა სამართალდამცავებმა დააკავეს. მან აღიარა, რომ პროვოკაციების მოწყობა ჰქონდა დავალებული.