ნორა კვიციანსაც აქეზებდნენ, მაგრამ ძალიან მორწმუნე ქალია და ხმა არ ამოუღია

საინფორმაციო საშუალებების პროგნოზით,  სააღდგომო ამნისტია 400-მდე პატიმარს უნდა მიეღო, მაგრამ მიუხედავად საპატრიარქოს შუამდგომლობისა, ქალთა კოლონიიდან შესაწყალებელთა სია 23 ადამიანით შეივსო და მათგან მხოლოდ 6 შეირჩა. პროგნოზი  არ გამართლდა, რასაც შედეგად 18 აპრილი მოჰყვა.

მომხდართან დაკავშირებით უშუალოდ ზედამხედველს ვესაუბრეთ, რომელმაც ზედმიწევნით იცის თითოეული პატიმრის ზნე-ჩვეულებები და 18 აპრილის ღამეს მორიგეობდა #5 კოლონიაში. ვინაობას მისივე ინტერესებიდან გამომდინარე არ ვასახელებთ.

ზედამხედველი: ,,რომ გაიგეს, 300 პატიმარი უნდა გამოუშვანო, მთელი ციხე ჩემოდნებზე იჯდა, დაახლოებით 50-მდე პატიმარია ისეთი, მძიმე მუხლი რომ აქვთ და მეორედ და მესამედ რომ არიან შემოსულები, თან ზოგი მიშას ვერ იტანს და ამ არეულობისას ააბუნტეს ისეთი პატიმრები, ხმასაც რომ არ ამოიღებდნენ.

ნორა კვიციანსაც აქეზებდნენ, მაგრამ ძალიან მორწმუნე ქალია და ხმა არ ამოუღია. ბაღათურია მოინდომეს დასალაპარაკებლად, თუმცა მერე ისიც დაიწუნეს, სოზარიც უხეშად მოიხსენიეს _ ,,მიშას ტრიაპკა" ხარო. შაშკინი ელოდა და, რომ არ დაწყნარდნენ, გადაანაწილა #1 კოლონიაში".
ჯონდი ბაღათურიას, წმინდა დღესასწაულების გამო, 21 აპრილს ვესაუბრეთ, რომელიც პროკურატურაში დაიბარეს მოწმის სტატუსით, 18 აპრილს მომხდარ ფაქტთან დაკავშირებით, რასაც 4 საათი და 30 წუთი დასჭირდა და რომელიც #1 ქალთა კოლონიაში საშვის არქონის გამო `შემთხვევითი მოწმე გახდა".

_ ბატონო ჯონდი, რატომ არ გქონდათ საშვი?

_ არ ვიცი, არასდროს დამჭირვებია. ყველგან ისე შევდიოდი და პარლამენტში დამრჩა. 18 აპრილს, სანამ მე წამოვიდოდი, არანაირი ძალის გადამეტებას ადგილი არ ჰქონია, მაგრამ მე რომ წამოვედი, მას შემდეგ, რაც ეტაპირება დაიწყო, ეჭვი მაქვს, რომ რაღაც მოხდა, თორემ დღეს შემიშვებდნენ.

_ ტელევიზიით გავრცელდა ერთ-ერთი პატიმრის ინტერვიუ, რომელიც ადასტურებს, რომ პატიმრებმა ბლაგვი საგნით მიიყენეს სხეულის დაზიანება. თქვენ თუ იცით ამის შესახებ რაიმე?

_ ეს შემთხვევა საერთოდ პირველად მესმის და თუ მართლა იყო ასეთი ფაქტი, მაშინ გამოდის, რომ შაშკინი გვატყუებს, ყოველ ნახევარ საათში რომ გამოდიოდა და ამბობდა, ერთი დაშავებული და დაზარალებულიც კი არ გვყავსო.  

_ საქმე კონკრეტული პირების მიმართაც არის აღძრული?

_ საქმე აღძრულია კონკრეტულ ფაქტზე, რის შემდეგაც გავლენ კონკრეტული პირების კვალზე. მათ აქვთ ზარები, უამრავი სატელეფონო ზარი იყო... გაშიფრავენ მოსმენებს და ამის შემდეგ დადგინდება ყველაფერი.

_ ვარაუდობენ, რომ #5 კოლონიის ტერიტორია იყიდება და უნდა დაინგრეს. ამის შესახებ თუ გაქვთ ინფორმაცია, ან დაახლოებით მაინც თუ გაარკვიეთ, როდისთვის დააბრუნებენ პატიმრებს #1 კოლონიიდან?

_ ამის შესახებ ინფორმაცია არა მაქვს. უბრალოდ, როგორც თვითონ ამბობენ, შიგნიდან არის დანგრეულიო, რასაც მე ვერ დაგიდასტურებთ, რადგან არ მინახავს დაზიანების შემდეგ ეს კოლონია. ალბათ, 1-2 თვეში ჩვეულ მდგომარეობაში მოიყვანენ შენობას და ეტაპობრივად გადმოიყვანენ პატიმრებს".

ჩვენებაზე შესულ ჯონდი ბაღათურიას პროკურატურის წინ რამდენიმე არშეწყალებული პატიმრის მშობელი ელოდა.

ლია ბაჩანაშვილი: 3 წელი აქვს მისჯილი და 10 თვე დარჩა. სანდო პირმაც დამირეკა და მითხრა, 17-ში შენს გოგოს სამებასთან დახვდიო, წინა დღეს ციხის უფროსს უთქვამს, მედიკო ალანია, ,,სვეშამიო", მაგრამ არ ვიცი, რა მოხდა.

18-ში დამირეკა, ეს ამბები რომ იყო, ციხეში, დედა, გოგოებმა თქვეს, მე მგონი, გაზის მილი გატეხეს, ალბათ ჩვენ რომ დაგვბრალდესო. კარებიც გაგვიღეს მაგრამ ჩვენ არ გამოვსულვართო.

ავადმყოფად მექცა შვილი, რომ დაიჭირეს, ,,კაპეზეზე" ისე უცემიათ, 2 კვირა ვერ დადიოდა. არ გვეუბნებოდა, უარესი არ გამიკეთონო. მწვავე ნეფრიტი აქვს, ისე ურტყიათ თირკმელებში, ერთხელ შეტევაც ჰქონდა თირკმელებისაგან და ძლივს მოუსულიერებიათ საავადმყოფომდე.

ჩემი შვილის გარდა ბევრია ისეთი, მართლა რომ ეკუთვნოდათ გამოსვლა, მაგრამ რატომ არ შეიწყალეს, არ ვიცით. იქ ისეთ დღეში არიან, ელემენტარულ ინფორმაციას ვერ იგებენ. ნეტავ ისევ აქეთ გადმოიყვანდნენ და ამნისტიას ვინღა დაეძებს".

როგორც პატიმართა მშობლები აცხადებენ, არც ერთი პატიმრისთვის არ მიუტანიათ პირადი ნივთები და, სამწუხაროდ, დაზუსტებით ვერც ვერავინ  ამბობს, თუ როდისთვის მოხდება პატიმრების ისევ შედარებით უკეთეს პირობებში, #5 კოლონიაში დაბრუნება.

P.S: დემოკრატიის მანტიით შემოსილ მინისტრ შაშკინში ბევრმა ოპოზიციონერმა უკვე ამოიცნო "გადაცმული მგელი". მათი აზრით, შაშკინისთვის სამართლიანობა და ადამიანის უფლებები იქ მთავრდება, სადაც მინისტრის სავარძელი იწყება. 

ოპოზიცია ფიქრობს, რომ მინისტრობა და სამართლიანობა შეუთავსებელი მცნებაა, შაშკინი რას ფიქრობს, კაცმა არ იცის, რადგან ჯერჯერობით რასაც ის აცხადებს, ეს მისი კი არა, მისი უფროსობის აზრი და ნაფიქრალია.