ე.წ. აფხაზურმა ეკლესიამ „საქართელოს ეკლესიისგან ოფიციალურად გამოყოფის“ შესახებ განაცხადა
აფხაზურმა ეკლესიამ საქართველოს ეკლესიისგან გამოყოფის თაობაზე გამოაცხადა. ამ ინფორმაციას „რია ნოვოსტი“ ავრცელებს. სოხუმ-აფხაზეთის ეპარქიის წინამძღოლის ე.წ. მოვალეობის შემსრულებელმა, ბესარიონ აპლიამ განაცხადა, რომ „აფხაზურმა ეკლესიამ ისტორიული სამართლიანობა აღადგინა და საქართველოს ეკლესიას ოფიციალურად გამოეყო“. „ქართულ-აფხაზური ომი შემდეგ ჩვენ არაერთხელ მივმართეთ უმაღლეს მართლმადიდებლურ ინსტანციებს, მაგრამ ყველა მათგანი დუმდა, რადგან ქართულ ეპარქიასთან ურთიერთობის გაფუჭება არ უნდოდათ“, - აღნიშნა აპლიამ. მისივე თქმით, სოხუმის საკათედრო ტაძარში გუშინ ეპარქიის ყველა საეკლესიო მსახურის შეკრება გაიმართა, რომელზეც აღნიშნული გადაწყვეტილება მიიღეს. „სოხუმ-აფხაზეთის ეპარქია 1943 წლიდან საქართველოს კათოლიკოსს ექვემდებარებოდა და აფხაზეთის ტერიტორია ძალადიბრივად გადასცეს საქართველოს ეკლესიას. დღეს ჩვენი დამოუკიდებლობის შესახებ შეგვიძლია განვაცხადოთ“, - განაცხადა ბესარიონ აპლიამ. მისი ინფორმაციით, აფხაზურ ეკლესიაში იქნება ბიჭვინთისა და სოხუმის ეპარქიები. აპლიას განცხადებით, ე.წ. აფხაზური ეკლესია აპირებს, დახმარებისთვის მოსკოვის პატრიარქს მიმართოს. აღსანიშნავია, რომ რუსეთის საპატრიარქო საქართველოს ეკლესიის კანონიკურ ტერიტორიას აფხაზეთისა და ცხინვალის რეგიონის ჩათვლით აღიარებს.
