თურქეთის პოპულარულ ტურისტულ რეგიონში, კაბადოკიაში, უბედური შემთხვევა მოხდა. ძლიერი წვიმებით გამოწვეული მეწყრის შედეგად, იუნესკოს (UNESCO) მსოფლიო მემკვიდრეობის ძეგლის სტატუსის მქონე გიორემეს ღია ცის ქვეშ არსებული მუზეუმის შესასვლელთან ვულკანური წარმოშობის უზარმაზარი კლდე, ე.წ. "ფერიების საკვამური" ჩამოიშალა.

ადგილობრივი ხელისუფლებისა და ნევშეჰირის პროვინციის გუბერნატორის, ჰუსეინ ქოქის განცხადებით, კლდის მასამ ავტოსადგომზე მყოფი ადამიანები მოიყოლა. ინციდენტის შედეგად, სულ მცირე, 3 ადამიანი დაიღუპა, ხოლო 5 მძიმედ დაშავდა. დაღუპულთაგან ორი თურქეთის მოქალაქეა, ერთი კი - უცხოელი ტურისტი. კიდევ 5 ადამიანი სხვადასხვა სიმძიმის დაზიანებებით  საავადმყოფოშია გადაყვანილი.

შემთხვევის ადგილზე მობილიზებული იყო მძიმე ტექნიკა, მაშველები და მედიკოსთა ჯგუფები, რომლებიც ნანგრევებში მოყოლილი სხვა შესაძლო მსხვერპლის ძებნას გვიან ღამემდე აგრძელებდნენ. თურქეთის იუსტიციის მინისტრის, აქინ გურლექის განცხადებით, მომხდარზე გამოძიება უკვე დაწყებულია.